Geyim əşyalarından olan ayaqqabılar da bəzən sizi həkimlərdən asılı vəziyyətə sala bilər. Ucuz ətin şorbası olmadığı kimi, ucuz ayaqqabıların da heç bir keyfiyyəti olmaz. Üstəlik bu cür ayaqqıbını sağlam ayaqla geyib xəstə ayaqla çıxarda bilərsiniz.

Paytaxtın istənilən küçəsində səyyar şəkildə kütləvi ayaqqabı satışına rast gəlmək olar. Özü də bu ayaqqabıların qiyməti həddindən çox ucuz olduğundan hər kəsin cibinə uyğun gəlir. Elə bu səbəbdən də belə ayaqqabıları alanlar çoxdur.

Satıcılar deyir ki, su qiymətinə satılan bu ayaqqabılar əsasən Çindən gətirilir. Alıcılar isə küçələrdə satılan ayaqqabıların keyfiyyətini qənaətbəxş hesab etməsələr də imkansızlıqdan almağa məcburuq deyirlər.

Həkimlər isə ucuz qiymətə satılan bu ayaqqabıların əsl təhlükə mənbəyi olduğunu və ayaqlara ciddi ziyan vurduğunu deyir.

50 ildən çoxdur pinəçilik edən Əli dayı isə deyir ki, ayaqqabı yalnız dəridən olmalıdır. Dəridən tikilməyən ayaqqabı ayaqları tərlədir və pis qoxu yaradır.

Bir sözlə araşdırmamızdan belə məlum oldu ki, ucuz ayaqqabılar insan sağlamlığı üçün ciddi təhlükə mənbəyidir. Odur ki, qiymətin ucuzluğuna aldanıb, canımızı, daha doğrusu ayaqlarımızı əldən verməyək.