Kanadanın Kvebek əyalətində üç ay əvvəl itkin düşən və ölüm ayağında tapılan kanadalı kişinin macərası eşidənləri heyrətləndirib. 44 yaşlı Marko Lavoyun sağ qalmaq üçün ağac qabıqlarını, sonra da itini yediyi deyilir. Kvebek əyalət polisinin zabiti Ronald MakAynnisin dediyinə görə, təcrübəli idmançı olan Marko Lavoy tapılanda onu ölümdən ən azı 38 saat ayırırdı.

"O, yenidən yeməyi, içməyi öyrənir. Lavoyu Ceyms Körfəzindəki sıx meşəlikdə tapdıq", - MakAynnis deyib.

Marko Lavoy Monrealdan 800 kilometr şimal-şərqdə, Mataqami gölünün sahilində tapılıb.Lavoyun ailəsinin dediyinə görə, göl sahilində çadır qurmuş Marko ayıların hücumuna məruz qalıbmış. Ayılar onun çadırını, kanoesini və bütün ərzağını məhv ediblər. Nəticədə Marko Lavoy iti ilə birlikdə meşədə qalıb.

Bir müddət ot, giləmeyvə, ağac qabığı yeyən Marko Lavoy sonradan acından ölməmək üçün itini daşla öldürərək yeyib. Mataqama səmtində son 30 ildə itkin düşənlərdən kimsə nə tapılıb, nə də geri qayıdıb.

Marko Lavoy indi xəstəxanadadır.