Yaya Ture ilin futbolçusu seçildi

Bu adı futbolçu ikinci dəfə qazandı

“Mançester Siti”nin yarımmüdafiəçisi Yaya Ture dalbadal ikinci dəfə Afrikada ilin futbolçusu adına layiq görülüb.

Bu qərar Afrika Futbol Federasiyasının Qananın Akkra şəhərində keçirilən iclasında verilib. Mübarizədə Ture həmvətəni “Şanxay Şenxua” klubunda çıxış edən və bu adı iki dəfə qazanan Didye Droqbanı qabaqlayıb. Üçüncü yeri isə “Barselona”nın kamerunlu yarımmüdafiəçisi Aleksandr Sonq tutub.

Qeyd edək ki, Yaya Ture bu il Kot- d`İvuar millisi ilə Afrika kubokunun finalına yüksəlib və “Mançester Siti”nin heyətində İngiltərə çempionu olub.

Abidal məşqlərə başladı

Futbolçu Erik Abidal "Barselona"da məşqlərə başlayıb

Bu ilin aprelində qara ciyəri dəyişdirildikdən sonra futboldan uzaq düşən “Barselona”nın müdafiəçisi Erik Abidal komandasında məşqlərə başlayıb.

Fransız futbolçu 9 aylıq fasilədən sonra yenidən futbola qayıdıb. O, bununla bağlı "Facebook" sosial şəbəkəsindəki səhifəsində belə yazıb: "Hər kəsə salamlar. Buradan ötən gün baş tutan hazırlıqda komandamla birgə məşqə çıxdığımı söyləmək istəyirəm".

Sonda ən qısa zamanda yaşıl meydanlara qayıtmaq istədiyini bildirən E.Abidal komandanın baş məşqçisi Tito Vilanovaya da Allahdan şəfa diləyib.

Maradonanın yeni vəzifəsi
Futbol əfsanəsi Dieqo Maradona İraq milli komandasının baş məşqçisi olacaq.

 Bu barədə Argentinanın Canchallena.com idman portalı xəbər yayıb.

Maradona İraqın Futbol Federasiyasından təklif alıb və buna razılaşıb. Bu gün Federasiyanın icraiyyə komitəsi müqavilənin maliyyə tərəflərini dəqiqləşdirəcək, bundan sonra müqavilə rəsmən elan olunacaq.