Messi daha bir rekord qırdı

Beynəlxalq Futbol Tarixi və Statistikaları Federasiyası (İFFHS) 2012-ci ildə keçirilən beynəlxalq oyunlarda ən çox qol vuran futbolçuların siyahısını açıqlayıb. Qol sayını 23-ə çatdıran Lionel Messi cədvələ başçılıq edir.

Argentina milli komandasında 12, İspaniyanın “Barselona” klubu ilə avrokuboklarda 11 qol vuran cənubi amerikalı bununla da yeni dünya rekordu müəyyənləşdirib. Belə ki, İFFHS-in “İlin beynəlxalq oyunlardakı ən məhsuldar futbolçusu” ilə bağlı hesablamalar apardığı 1991-ci ildən indiyədək heç kim bu qədər qol vurmamışdı.
Lakin Messinin futbol tarixinin mütləq rekordunu müəyyənləşdirməsi hələ mümkün olmayıb. Belə ki, uzaq 1909-cu ildə İngiltərə yığmasındakı 10 oyuna 25 qol vuran Con Vudvarta çatmaq üçün argentinalı daha 2 dəfə fərqlənməlidir. Bunun üçün argentinalının Çempionlar Liqasının qrup mərhələsində “Barselona”nın heyətində keçirəcəyi 2 oyun var.

Kaka “Real Madrid”i tərk edir

Əvvəllər hücumçu gələcəkdə də “kral klubu”nun şərəfini qorumaq istədiyini bildirirdi.

Amma deyəsən, o, mövqeyini dəyişib. Şəxsi meneceri olan atası “Real Madrid” rəhbərliyi ilə görüşündə Kakanın yanvarda digər komandalara keçid variantını nəzərdən keçirməyə hazır olduğunu bəyan edib.
Qeyd edək ki, Kaka “Real Madrid”ə 2009-cu il iyunun 3-də İtaliya “Milan”ından rekord məbləğə - 65 milyon avroya keçib.

Ronaldonun 3 müştərisi ortaya çıxıb

Dünyanın ən yaxşı futbolçusu olan Kriştianu Ronaldonun 3 müştərisi ortaya çıxıb. Madrid “Real”ında xoşbəxt olmadığını açıqlayan 27 yaşlı portuqaliyalı hücumçu artıq gələn yay transfer dövründə gedişini reallaşdıra bilər.

Onun xidmətində 2003-09-cu illərdə oynadığı “Mançester Yunayted”, son İngiltərə çempionu “Mançester Siti” və Fransanın PSK klubu maraqlı olduğundan, mübarizəyə hazırdırlar.
Qeyd edək ki, Kriştianu 2009-cu ildən oynadığı, heyətində İspaniya çempionluğu və kuboku qazandığı Madrid təmsilçisində 113 oyunda 124 qol vurub.