Meri Qennon ABŞ-ın Ohayo ştatındakı Leykvudl şəhərində məktəbdə dərs deyir.

O, şagirdlərinə riyaziyyat öyrədir.
Azad.Az Fox8-ə istinadən bildirir ki, Merinin qolları olmasa da, yazı taxtasında teorem və aksiomları yazır, kompüterdə misal və məsələləri həll edir, uşaqlara riyaziyyatı tədris edir.

Gözünü açanda özünü Meksikadakı uşaq evində görən Meri 7 yaşında olanda onu Ohayodakı amerikalı ailə övladlığa götürmüşdü.

Ötən il məktəbdə dərs deməyə başlayan Meri işə müəllim və tərbiyəçini əvəzləməklə başlamışdı.

İndi isə o, 6, 7 və 8-ci siniflərdə riyaziyyat dərsləri deyir.
Özü də Meri müəllimin maşınının nömrə nişanı da "Happy Feet"dir.

"Mənə əlil deyəndə xoşum gəlmir, çünki qollarım olmasa da, işləyirəm və uşaqlara nə isə öyrətməyə çalışıram. Kimsənin mənə yazığının gəlməsini də istəmirəm. İnsanlara dəstək verməyə, yardım etməyə çalışıram və ümid edirəm ki, insanlar mənim zahiri görkəmimi yox, bacarığımı qiymətləndirəcəklər", - Qennon deyir.

Şagirdlər də Merini çox sevirlər.
"O, bizi ruhlandırır. Meriyə baxanda anlayırıq ki, insan hər çətinliyin öhdəsindən gələ bilər", - 8-ci sinif şagirdi Kembri Qriffin söyləyir.