ABŞ-ın Kanzas-Siti şəhərində yaşayan 10 yaşlı qız kimya müəlliminin tapşırığını yerinə yetirərkən tam təsadüf nəticəsində dünya elminə məlum olmayan molekulyar struktura malik maddə kəşf edib.

Alimlərin dediklərinə görə, bu maddə enerjinin yığılması ilə bağlı yeni metodların əldə edilməsinə yardım edəcək.

Milli.Az "Fox"a istinadən bildirir ki, Kaliforniya ştatındakı Humbolt Universitetində olayla bağlı araşdırmalar başlanıb.
5-ci sinif şagirdi Kler Leyzen hazırda Mariya Montessori metodikası ilə fəaliyyət göstərən məktəbdə oxuyur.
Dərslərdən birində müəllim ona rəngli kürəcik-"atom"lar və plastik çöplər - "kimyəvi rabitə"lərdən molekul modelini yığmağı tapşırmışdı.

Klerin azot, oksigen və karbon "atom"larından yığdığı molekul konstruksiyası onun müəllifi Kennet Berə çox qəribə təsir bağışlayıb.
Müəllim dostu, Humbolt Universitetinin kimya professoru Bob Zellnerlə əlaqə saxlayaraq ona qəribə konstruksiyanın fotosunu yollayıb.

Zellner konstruksiyanın nədən ibarət olduğunu dərhal müəyyənləşdirə bilmədiyi üçün universitetin məlumat bazasında axtarış aparıb. Məlum olub ki, tetranitraksikarbon adlı maddə 9 yaşlı qızın yaratdığı konstruksiyaya bənzəyir. Fəqət, məktəbli qızın konstruksiyasında atomlar fərqli struktura malikdir.

"Klerin yaratdığı strukturlarda nitroqliserindəki təki atom qrupları olduğundan, 9 yaşlı qızın yeni, çox güclü partladıcı maddə kəşf etdiyini güman eləmək olar", - Zellner deyib.