YouTube videoservisində çox məşhur olan, "MagicofRahat" niki ilə tanınan Rahat Hüsseynin prankster (videozarafatçı) stilində çəkdiyi yeni video ilə internet fenomeninə çevrilib. Mart ayında Rahat Hüsseyn ABŞ-ın Siettl şəhərində küçələrdə yaşayan evsiz-eşiksiz Erik ilə tanış olur. R.Hüsseyn bu evsizi sevindirmək üçün saxta lotereya bileti hazırlamış və sonra da o bileti supermarketlərdən birində Erikə verərək "Təbrik edirəm, lotereyada 1000 dollar uddun!" demişdi. Təbii ki, uduş yoxdu: Rahat Hüsseyn evsiz olsa da, küçədə yaşasa da, qürurunu itirməyən və dilənməyən Erikə 1000 dollar vermək istəyirdi. Erik inanmış, bileti almışdı. Həmin anların əks olunduğu video YouTube-da baxış rekordu vurmuşdu. Daha sonra isə Rahat Hüsseyn evsiz Eriki evlə təmin etmək qərarına gəlir. "İnternetdəki tamaşaçılara və sosial şəbəkələrdəki profilimin oxucularına müraciət etdim. Erik evsiz olsa da, narkoman və ya əyyaş deyildi. O, iş axtarırdı, həyatını dəyişmək istəyirdi. Məni eşitdilər, Erikə yardım kampaniyası başlandı", - R.Hüsseyn deyib. Onun sözlərinə görə, kampaniya bir neçə ay davam edib və bu vaxtda 44 min dollar yığılıb. Evsiz Erik isə Rahat Hüsseynin pulunu ödədiyi moteldə qalırdı. "Erikin küçədə qalmasını, təhlükədə olmasını istəmirdim. Çünki həmin küçədəki avaralar, narkomanlar, banditlər Erikin 1000 dollar udduğunu eşitmişdilər. Erik üçün moteldə ucuz otaq tutdum. Sonra isə onun üçün iş aramağa başladım", - Rahat Hüsseyn deyir. Erik moteldə yaşamağa başladığı gündən cəmi 4 gün sonra özü iş tapır və çalışmağa başlayır. Rahat Hüsseyn isə artıq Erik üçün ikiotaqlı evi kirayəyə götürmüşdü. Ev internet istifadəçilərinin yığdıqları pul hesabına mebel və məişət texnikası ilə döşənmişdi. Yığılan 44 min dolların 11 min dolları 1 illik kirayəyə, 12 min dolları kommunal xərclərə, paltara və ərzağa xərclənəcəkdi. 21 min dollar isə Erikin adına açılmış bank hesabına yatırılmışdı. Erik evə daxil olanda bu mənzilin Rahata məxsus olduğunu düşünür. Lakin o, mənzilin sahibinin özü olduğunu biləndə kövrəlir. Bu videoya baxan milyonlarla insan da kövrəldiklərini yazıblar.
Hörmətli ziyarətçi, Siz qeydiyyatdan keçməmiş istifadəçi kimi sayta daxil olmusunuz.
Biz Sizə qeydiyyatdan keçməyi və ya öz adınz ilə sayta daxil olmağı məsləhət görürük.