Argentinada Kapitan adlı alman itinin sahibi Migel Quzman 2006-cı ildə ölüb. Onun ölümündən dərhal sonra it evdən qəbiristanlığa qaçıb. Artıq altı ildir it sahibinin məzarının yanını tərk etmir.

İtin sədaqəti ilə bağlı unikal hadisə barədə Argetina KİV-i məlumat yayıb. Migel Quzman iti oğlu Deamian üçün alıbmış. Lakin Kapitan Migeli öz sahibi kimi qəbul edib. İti aldıqdan bir il sonra Migel Quzman dünyasını dəyişib. Ailə dəfndən evə qayıdanda isə artıq iti evdə tapa bilməyib. Ailə üzvləri iti axtarmağa başlasalar da, onu tapa bilməyiblər. Onlar bir həftə sonra qohumlarının məzarını ziyarət etmək üçün qəbiristanlığa gedəndə isə Kapitanı öz sahibinin məzarı yanında oturmuş vəziyyətdə görüblər.

“Biz heç vaxt onu qəbiristanlığa aparmamışıq”, – Migelin həyat yoldaşı təəccüblə bildirib. O, itin məzarlığın yolunu necə tapdığını anlamadığını deyib. “Biz onu tapandan sonra evə gətirdik. Lakin az keçmədən yenidən məzarın yanına qaçdı. Qəribə hissdir. O, sahibini gecələr tək qoymaq istəməyib”, – qadın əlavə edib.