İrlandiya sakini ekiz uşaqlarını 3 ay fasilə ilə dünyaya gətirib. The Daily Mail bildirir ki, bu hadisə Ginnesin Rekordlar Kitabına düşə bilər.

34 yaşlı Mariya Cons Elliot hamiləliyinin 23-cü həftəsində vaxtından əvvəl sancılarla xəstəxanaya qaldırılır. İki gündən sonra ekizlərdən biri olan Emi dünyaya gəlir. Vaxtından 4 ay əvvəl gələn qızcığazın çəkisi o zaman cəmi yarım kiloqramdan bir az artıq olur. Sonra sancılar tamamən kəsilir və ikinci qızcığaz həkimlərin məsləhəti ilə ananın bətnində qalır.

İlk öncə həkimlər uşağın doğuşunu süni yolla həyata keçirməyə qərar verirlər. Lakin uşağın anası dərmanlara heç bir reaksiya vermir. Mariyanın yatdığı Waterford Regional Hospital xəstəxanasının ginekoloqu Eddi O-Donella qərara alır ki, gözləsinlər.

Nəticədə birinci doğumdan 87 gün sonra, hamiləliyin 37-ci həftəsində tamamilə sağlam qızcığaz – Keti dünyaya gəlir.

Qeyd edək ki, bundan əvvəlki rekord Pensilvaniya ştatından Peqi Linə məxsusdur. Onun ekizləri arasında interval 84 gün çəkib: 1995-ci ilin noyabrın 11-də qızı Hanna, 1996-cı ilin fevralın 2-də isə onun ekiz tayı Erik dünyaya gəlmişdi.