Azərbaycan Dövlət Filarmoniyasında keçirilən vida mərasimində sənət aləminin tanınmış simaları, mərhumun ailəsi iştirak edib. 

Kaman ustası H.Əliyevin xanımı Şərqiyyə Əliyeva mediaya açıqlama verib. O, həyat yoldaşı ilə bağlı xatirələrini bölüşüb:

“Habilin ömrü bura qədər imiş. İnsanlar onu çox sevirlər. Ona görə də Habilin xatirəsi, sənəti, kamançası hər zaman yaşayacaq. Habil heç nədən nigaran getmədi. Həmişə deyirdi ki, həyatda mənə hər şey qismət olub. Xalq da, dövlət də Habili çox sevib, çox qiymətləndirib. Deyirdi, ayağa duran kimi, jurnalistləri evə yığıb, hamısına qonaqlıq verəcəyəm. Mənimlə çox maraqlanırlar”.

Vida mərasimində baş nazirin müavini, xalq yazıçısı Elçin Əfəndiyev, Milli Məclisin sədr müavini Ziyafət Əsgərov, mədəniyyət və turizm naziri Əbülfəs Qarayev, nazir müavini Ədalət Vəliyev, Bəstəkarlar İttifaqının sədri Firəngiz Əlizadə, mərhumun sənət dostları, ailə üzvləri, ictimaiyyət nümayəndələri iştirak ediblər.
 
Nazir Əbülfəs Qarayev vida mərasimində bildirib ki, H. Əliyevin simasında Azərbaycan mədəniyyəti böyük musiqi xadimini itirib.
 
Bəstəkarlar İttifaqının sədri Firəngiz Əlizadə Habil Əliyevin Azərbaycan ifaçılıq sənətinə gətirdiyi yeniliklərdən danışıb, onu böyük sənətkar kimi dəyərləndirib.

Xalq artistləri Siyavuş Kərimi, Canəli Əkbərov, Arif Babayev və başqaları da Habil Əliyev haqqında xatirələrini danışıb, onun Azərbaycan musiqisinin inkişafındakı xidmətlərini qeyd ediblər.
 
Ailəsi adından çıxış edən nəvəsi Əli Əmirəliyev vida mərasimində iştirak edənlərə təşəkkürünü bildirib.
 
H.Əliyev I Fəxri xiyabanda dəfn olunub.

Qeyd edək ki, kaman ustası Habil Əliyev səhhətində yaranan problemlərə görə avqust ayının 15-də ürək və tənəffüz çatışmazlığı diaqnozu ilə xəstəxanaya yerləşdirilmişdi. Daha sonra ifaçının səhhəti normallaşmış, müayinəsini evdə davam etdirməsi üçün avqustun 22-də evə buraxılmış, bir neçə gün əvvəl isə yenidən komaya düşmüşdü.