Bakı Metropoliteninin maddi-texniki bazasının yenilənməsi istiqamətində işlər davam etdirilir. Bu işlər sahəsində əsas yerlərdən biri vaqon parkının müasir tələblər səviyyəsinə çatdırılması dayanır.

Azad.Az xəbər verir ki, Bakı Metropolitenindən Oxu.Az-a verilən məlumata görə, artıq Tbilisidə əsaslı təmirdən keçmiş, modernləşdirilmiş 4 qatar Bakı metrosunun xətlərinə buraxılıb.

Onlardan ikisi 2014-cü ildə - biri (Leninqrad Yeqorov adına zavodun 1988-ci ildə istehsal etdiyi 81-714.5 tipli baş vaqon nömrəsi 8847-8861 olan qatar) iyul ayında, digəri isə (“Metrovaqonmaş”ın 1989-cu ildə buraxdığı 81-717/81-714 tipli baş vaqon nömrəsi 0178-0179 olan qatar) noyabrda istismara verilib.

Metropolitendən həmçinin bildiriblər ki, bu günlərdə daha bir qatar Tbilisidən “Nərimanov” elektrik deposuna gətirilib.

Son sazlama, yoxlama və sınaq işlərindən sonra qatar fevralın 16-da tam müasirləşdirilmiş görkəmi ilə xəttə çıxarılıb.

Müasirləşdirilmiş vaqonların salonu odadavamlı materiallarla təchiz edilib, qatarların nəfəslikləri yenilənib.

Metrodan həmçinin bildiriblər ki, “Bakı Metropoliteni” QSC-nin sədri Zaur Hüseynovun əmrinə əsasən, baş vaqonları (8857-8858 nömrəli) 1988-ci, aralıq vaqonları isə (0555-0556-0557 nömrəli) 1989-cu ilin istehsalı olan qatar da Tbilisi Elektrik Qatarlarının Təmiri Zavodunda əsaslı təmir edilərək, modernləşdiriləcək.