Erməni bloqqeri Albert Voskanyan işğal altında olan Laçın rayonunda çəkdiyi şəkilləri paylaşıb.
Fotolardan yalnız bu qənaətə gəlmək mümkündür: vaxtilə Azərbaycanın ən dilbər guşələrindən biri olan Laçın rayonu 20 ildir ki, erməni işğalı altında olmasına baxmayaraq, hələ də acınacaqlı vəziyyətdədir.
Sakinlərinin demək olar ki, güc-bəla ilə dolandıqları bu rayon kabusların şəhərinə çevrilib. Onu da qeyd edək ki, Laçın rayonundakı dağıntıları və xarabalığa çevrilmiş əraziləri əks etdirən buna bənzər şəkillər 2013-cü ilin iyulunda Azərbaycanın işğal altında olan bu ərazilərinə səfər edən digər bir erməni bloqçusu – Onnik Krikoryan tərəfindən çəkilərək yayılıb.
Qeyd edək ki, Laçın Azərbaycanın cənub-qərbində, dağlıq ərazidə yerləşir. Şimaldan Kəlbəcər, şərqdən Xocalı, Şuşa və Xocavənd, cənubdan Qubadlı rayonu ilə, qərbdən isə Ermənistanla həmsərhəddir.
Düz iyirmi bir ildir ki, 60 mindən artıq laçınlı respublikanın 59 şəhər və rayonunda müvəqqəti məskunlaşaraq, məcburi köçkünlük həyatı yaşayır. Rayonun bütün icra strukturları isə Ağcabədi rayonunun Taxtakörpü ərazisində fəaliyyət göstərir.
Rayon İcra Hakimiyyətinin məlumatına görə, rayonun işğalı nəticəsində 1 şəhər, 1 qəsəbə, 125 kənd düşmən əlinə keçib. 13 min 745 fərdi ev, 48 sənaye, 63 kənd təsərrüfatı obyekti, 133 iri və orta müəssisə, 20 tibb müəssisəsi, 101 məktəb, 5 məktəbdənkənar, 2 məktəbəqədər müəssisə, 1 peşə məktəbi, 142 səhiyyə, 217 mədəniyyət ocağı, 460 ticarət obyekti, 30 rabitə qovşağı, xalq teatrı, tarix-diyarşünaslıq muzeyi, 200-dən çox tarixi abidə talan edilərək dağıdılıb.
Qarabağ müharibəsi cəbhələrində 260-dan çox laçınlı şəhid olub, 66 nəfər girov götürülüb, 105 nəfər əlil vəziyyətinə düşüb. // azxeber.com
Hörmətli ziyarətçi, Siz qeydiyyatdan keçməmiş istifadəçi kimi sayta daxil olmusunuz.
Biz Sizə
qeydiyyatdan keçməyi və ya öz adınz ilə sayta daxil olmağı məsləhət görürük.