Bu dəfə Azərbaycanda olanda Türkiyə, Ukraniya, Moldova, Gürcüstan kimi ölkələr başda olmaqla xarici ölkələrin universitetlərinə gəncləri "daxil edən" şirkətlərin çoxluğuna təəccübləndim. Bir az maraqlandım və bu şirkətlərin gənclərdən 1500-3000 manat arasında ödəniş aldığını gördüm. Bu ödəniş onların dediyinə görə, universitetə yerləşdirmək, sənədlərin düzəldilməsi və universitetə qəbul olduqdan sonra viza üçün sənədlərin təsdiqlənməsi haqqıdır. Üstəlik şirkətlərin aldığı bu məbləğə bilet pulu, evlərə yerləşdirmə xərci daxil deyildir. Üstəlik bu şirkətlərin çoxu dələduzluqla, saxta sənəd hazırlamaqla məşğuldur! Diqqətli olun! 

Xarici ölkələrdə təhsil alan hər tələbəyə məlumdur ki, adı sadalanan ölkələrdə universiteti qazanmaq üçün vur-tut 200-300 manat pul kifayətdir. Bu şirkətlərin gördüyü iş sadəcə, bir neçə universitetə tələbələrin sənədlərini internet üzərindən göndərməkdir. (Türkiyə universitetləri sənəd qəbulu üçün 100-150 TL pul alır). Tələbə universitetə qəbul olduqdan sonra guya bu şirkətlər sənədləri tələbəyə təqdim edir və onun işi də orada bitir. Amma verilən başqa vədlər bundan qat-qat çoxdur.

Tələbənin əsas çətinlikləri bundan sonra başlayır. Həmin çətinlikləri isə tələbələr o şirkətlərin köməyi ilə deyil, məhz özləri aşırlar. Həmin şirkətlərə pul verən insanları da anlayıram, hər şey başda çox çətin və qəliz görünür. Burada hər şeyi daha da kompleks şəkildə göstərən o şirkətlərin marketoloqları da rol oynayır.

Ancaq insanlar özləri sənəd verməyi öyrəndikdən sonra bunun nə qədər asan olduğunu görəcək və həmin şirkətlərə ehtiyac qalmayacaq. Onlara sadə bi iş üçün pul ödəmək həm sadəlövlük, həm də ali savadlı, dünyagörüşlü insanlar üçün böyük ayıbdır. Axı hər şeyi özümüz edə bilərik.

İzin verin, sizə o çirkətlərlə iş görməmək üçün bir neçə səbəb göstərim:
1) Adı sadalanan ölkələrin universitetlərinə sənəd göndərmək heç də çətin deyil. Bunu özünüz çox asanlıqla edə bilərsiniz. Ümumi olaraq universitetlər sizdən attestatın və pasportun surətini, fotoşəkil, TQDK imtahanından əldə etdiyiniz bal haqqında rəsmi sənədin, eləcə də banka ödənişə görə sizə verilən çekin surətini istəyirlər.

2) Artıq bütün gənclər internetdən istifadə edə bilirlər. Bu sənədləri internetlə göndərirsiniz. Bank hesab nömrəsi də internetdə olur, sənəd qəbulu ucun də ödənişi də ordan edirsiniz.

3) Bütün proses üçün sizdən ən çox 100 manat pul çıxacaq.

4) Bu işi şirkətlər vasitəsilə etdikdə ödədiyiniz məbləğin 90 faizi sadəcə, o şirkətdəkilərin cibinə gedir. Ora ödədiyiniz pulla övladınızın 1, bəlkə də 2 illik universitet xərcini ödəyərsiniz. Şirkətə ödənilən ortalama 2000 manatın sadəcə, 300 manatı istifadə edilir, qalan 1700 manat şirkət işçilərinin cibinə gedir. 1700 manat 4300 TL edir. Bu da bir cox fakultənin iki illik təhsil haqqina bərabərdir.

Əminəm ki, Gürcüstan və Ukrayinada təhsil haqqi daha da ucuzdur. Mən, insanlar taniyiram ki, bu şirkətlərə 2000 manat verib, oğlu universitetə qəbul olub, amma pulu çatmayib ki, universitetin haqqini ödəsin. Ona gorə də məcbur qalıb ki, Azərbaycana geri qayıtsın. Verdikləri pul da batıb, universitet də. Nəyə görə siz bu dələduzlara aldanmalısınız?

5) Övladınız universiteti qazanandan sonra sizin ünvana və ya mail adresinizə qəbul haqqda məktub gəlməlidir. Bu məktub sadecə, sizin universitetə girməyinizin təsdiqidir. Bu məktubu o şirkətlərin çoxu saxta olaraq hazırlayırlar!!! Yəni siz qazanmasanız da, özlərini sındırmaq və sizdən aldıqları yüksək məbləğin qarşılığı olaraq qarşınızda özlərini günahkar kimi göstərmək istəmirlər. Sizə saxta şəkildə universiteti qazandığınız haqqda sənəd təqdim edirlər. Bu sənədin saxtalığını ya muvafiq ölkənin səfirliyində öyrənirsiniz, ya da ən pis halda övladınız girdiyi universitetə qeydiyyat üçün gedəndə orada açıqlanılır. Maddi çöküntüdən əlavə sizə mənəvi əzab da yaşadırlar.

Ona görə də bu şirkətlərə əsla etibar etməyin! Ən azından pulunuzu boşuna sərf etməyin!

Tənbəllik etməyin, sadəcə bir az vaxtınızı sərf edin və universitetə sənəd vərmək işini özünüz həll edin! Əminəm ki, artıq hamımızın qohum-qonşuları arasında xaricdə təhsil almış insanlar var. Onlardan kömək istəyin, heç kim sizi rədd etməz.

Yenə deyirəm, o, şirkətlərə etibar etməyin. Bununla da dələduzların sizdən istifadə edib zənginləşməsinə səbəb olmayın!

^Teleqraf.com