Onları Bakıya gətirən taksi sürücüsü dindirilib; qızları polisin əməliyyat qrupu və valideynləri axtarır;

şagirdlərlə telefonda danışan şəxsin axtarışı gedir

Fevralın 14-də Kürdəmirin Carlı kənd sakinləri olan üç məktəbli qız evdən çıxaraq geri qayıtmayıb. 16 yaşlı Tünzalə Şirəliyeva, 16 yaşlı Röyalə Novruzova və onun əkiz bacısı Minayə Novruzova yaşadıqları kənddən Kürdəmir rayonunun mərkəzinə hazırlıq məqsədilə müəllim yanına getmək adı ilə evdən çıxıb və geri qayıtmayıblar. Onların valideynləri bu barədə Kürdəmir Rayon Polis Şöbəsinə məlumat verib. 

Araşdırmalar zamanı məktəbli qızların müəllim yanına getmədiyi məlum olub. Polis məktəbli qızları itkin düşmüş kimi qeydiyyata alıb. Kürdəmir RPŞ-dən APA-ya verilən məlumata görə, araşdırmalar nəticəsində məktəbli qızların Kürdəmir avtovağzalından Müşfiq adlı taksi sürücüsünün maşını ilə Bakıya getdiyi müəyyənləşib. Həmin sürücü polis tərəfindən saxlanılıb. Polis tərəfindən dindirilən taksi sürücüsü qızları Bakıya apardığını təsdiqləyib. Bildirib ki, qızlar Bakı Beynəlxalq Avtovağzalının ərazisində maşından düşüb. Bakıya gedərkən onlar yolda tez-tez Qismət adında bir nəfərə zəng edirmişlər. Avtovağzala çatanda da qızlar o şəxsə zəng edərək artıq Bakıda olduqlarını, onu avtovağzalın ikinci mərtəbəsində gözlədiklərini bildiriblər.
Daxili İşlər Nazirliyinin Kürdəmir RPŞ əməkdaşları ilə birgə həyata keçirdiyi tədbirlər nəticəsində qızlarda olan mobil telefonla onların Bakıya çatan zaman kimə zəng etdikləri müəyyənləşib. Hazırda polis həmin şəxsin tutulması istiqamətində tədbirləri davam etdirir.
Kürdəmir RPŞ istintaq şöbəsinin rəisi Sadiq Əfəndiyev “Yeni Müsavat”a açıqlamasında deyib ki, hazırda qızların müəyyən olunması üçün Bakıya Kürdəmir RPŞ-dən əməliyyat qrupu göndərilib. Rəis məktəblilərdən birinin mobil telefonu olduğunu, o nömrəyə zəng çatmadığını deyib. Qızların valideynlərinin də Bakıya gələrək onları axtardıqlarını söyləyib. Ailələrində hər hansı bir problemin olub-olmaması ilə bağlı suala isə “heç bir problem olmayıb” deyə cavab verib. Tezliklə məktəbli qızların müəyyən olunaraq valideynlərinə təhvil veriləcəyinə ümid etdiyini vurğulayıb. Mövzuya qayıdacağıq