Gecə saat 01.05 radələrində Şəki rayonu ərazisində güclü zəlzələ qeydə alınıb. Səhər kimi isə bir neçə xırda təkanlar təkrarlanıb. 

Sakinlər üç təkanla baş verən zəlzələnin 5-6 bal arasında dəyişdiyini ehtimal edir. Şəki şəhəri ərazisində dağıntılar olmasa da qorxudan həyəcan keçirən və həkimə müraciət edənlərin sayı onlarladır. Bütün gecəni Şəki sakinləri, xüsusən çoxmərtəbəli binalarda yaşayanlar həyətlərdə keçirib. Rayonun müvafiq təşkilatları şəhər ərazisində əhalinin təhlükəsiz yerlərdə daldalanması üçün şərait yaradıb.

 Bu arada Fövqəladə Hallar Nazirliyinin rəsmi saytında zəlzələ barədə məlumatlar yerləşdirilib. Belə ki, Fövqəladə Hallar Nazirliyinin Böhran Vəziyyətlərində İdarəetmə Mərkəzinə Azərbaycan Milli Elmlər Akademiyası Respublika Seysmoloji Xidmət Mərkəzindən daxil olmuş məlumata əsasən, 26 iyun 2012-ci il tarixində Bakı vaxtı ilə saat 01:05-də Şəki şəhərindən 10 km qərbdə zəlzələ qeydə alınıb. Yeraltı təkanların gücü episentrdə 12 ballıq cədvəl üzrə 4,5 bal təşkil edib. İnsan tələfatı və dağıntı haqqında məlumat daxil olmayıb.