Bakıda I Avropa Oyunları çərçivəsində kişilər arasında 68 kiloqram çəki dərəcəsində taekvondo yarışlarında mübarizə aparan Ayxan Tağızadə final görüşünə çıxıb.

Azad.Az xəbər verir ki, kişilərin yarışında mübarizə aparan idmançımız, yeniyetmələr arasında Avropa çempionatının ikincisi Ayxan Tağızadə (-68 kq) ilk görüşdə qitə birinciliyinin mükafatçısı sloveniyalı Jure Pantaraya 11:3 hesabı ilə qalib gələrək dörddəbir final mərhələsinə adlayıb. Ayxan Tağızadə ispaniyalı Joel Bonilla Qonzalezi 7:5 hesabı ilə məğlub edərək yarımfinalda rusiyalı Aleksey Denisenko ilə qarşılaşıb. Taekvondoçumuz rəqibini 7:5 hesabı ilə məğlub edərək finala yüksəlib.

Finalda idmançımız Polşa təmsilçisi Karol Robakla qarşılaşıb. Rəqibin 10:9 hesabı ilə məğlub edən həmyerlimiz ölkə adına 11-ci qızıl medalı qazanıb.

Qadınların yarışında ilk görüşdə serbiyalı idmançı, London Yay Olimpiya Oyunlarının iştirakçısı Draqana Qladovic ilə qarşılaşan Azərbaycan taekvondoçusu Günay Ağakişiyeva (57 kq) isə rəqibinə 4:8 hesabı ilə məğlub olub.