"Mənim üç ali təhsilim var və mən ayaqyolu təmizləyirəm”.

Londonda yaşayan 25 yaşlı ispaniyalı Bencamin Serra Boş Avropada gənclər arasında işsizliyin simvoluna çevrilib.

Bencamin doğma İspaniyasında ali təhsilini tətbiq etməyə yer tapa bilməməsi barədə əhvalatını Facebook-da ötən həftə dərc edib.

Bencaminin sosial şəbəkədəki yazısı göstərdi ki, Barselonada biznes-məktəbdə magistratura da daxil olmaqla, üç ali təhsili olan gənc iş tapmaq ümidi ilə vətəni İspaniyanı tərk edib və Böyük Britaniyaya yola düşüb.

İndi Bencamin Serra Boş Londonda yaşayır. Və o iş tapıb: gənc pul qazanmaq üçün ayaqyolu təmizləyir.

Onun Facebook-da ispanca yazdığı yazının tərcüməsi belədir:

“Mənim adım Bencamin Serradır. Mənim iki bakalavr və bir magistr dərəcəm var. Və mən ayaqyolu təmizləyirəm. Yox, bu zarafat deyil. Mən, Londonda yaşadığım mənzilin kirayə haqqını ödəmək üçün bunu etməli oluram. Burada may ayından etibarən Böyük Britaniyada məşhur olan kafelərdən birində işləyirəm. Və bu gün ilk dəfə olaraq, işə başladığım vaxtdan 5 ay ötdükdən sonra anladım ki, indi vəziyyəti kifayət qədər açıq-aydın dərk edirəm. Mən ayaqyolu təmizləyirəm. Mənim fikirlərim belə idi: “Mən iki ali təhsil müəssisəsini fərqlənmə ilə bitirdim və hətta mənim Vətənim belə olmayan ölkədə ayaqyolu təmizləyirəm”.

Əlbəttə, mən təkcə bunu etmirəm. Mən həm də kofe hazırlayır, stolları silir və fincanları yuyuram. Və mən utanmıram. Bu iş kifayət qədər normaldır. Məni pis edən yeganə məqam odur ki, bunu İspaniyada iş tapmaq şansım olmadığı üçün edirəm. Londonda mənim kimi ispaniyalı çoxdur. “Siz bir taun xəstəliyisiniz” – deyə, bir dəfə mənə dedilər. Və gəlin buna uşaq kimi baxmayaq. Biz macəra axtaran, dil öyrənmək və maraqlı təcrübə əldə etmək istəyən yeniyetmələr deyilik. Biz – mühacirlərik. Və mən həmişə qürurlu olmuşam, çünki mən sadəcə baristayam (bizləri burada belə adlandırırlar).

Bəziləri özlərini o qədər həyasızcasına aparırlar ki, diplomlarımı çıxarıb onların gözlərinə soxmaq istəyirəm. Lakin bu heç nəyi dəyişməyəcək. Belə təəssürat yaranır ki, bu kağızları yalnız ayaqyolunu təmizləmək üçün istifadə etmək olar. Kədərlidir. Düşünürdüm ki, təhsil vaxtı bu qədər zəhmət çəkdikdən sonra daha çox şeyə nail olacam. Deyəsən, mən səhv etmişəm”.

Gənc ispanın yazısı yüzlərlə şəxs tərəfindən bəyənilib və paylaşılıb. Britaniyanın “Daily Telegraph” qəzeti Bencamin Serra Boşu İspaniyanın itirilmiş nəslinin səsi adlandırıb.

Boş belə bir vəziyyətə düşmüş yeganə avropalı deyil. Avqustun sonunda İspaniyada 25 yaşadək gənclər arasında işsizlik səviyyəsi 56,1%-ə çatıb. Bu rəqəm çox yüksək, rekord bir göstəricidir.

Bir qədər əvvəl isə “Bloomberg” agentliyi bildirmişdi ki, 2009-2010-cu illərlə müqayisədə iş üçün Böyük Britaniyaya gəlmiş ispanların sayı 2 dəfə artıb: çoxlu sayda yüksək təhsilli gənc mütəxəssislər fastfud və digər aşağı məvacibli işlərdə çalışmalı olurlar.

span style=