Qızımı ölümə öz əlimlə yol saldım. Kaş həmin gün onu buraxmayaydım. Qızımın son dəfə “Ata, nigaran qalma, 1 saat qayıdıram”, deməsini heç vaxt unutmayacağam. Günay sözünə sadiq qaldı, gecikmədi, özü gəlməsə də, 1 saat sonra ölüm xəbəri gəldi”.

Bu sözləri ANS PRESS-ə aeroport yolunda baş verən qəzada dünyasını dəyişən Bakı Metropoliteninin işçisi Günay Məmmədovanın atası Hüseyn Məmmədov ürəkyanğısı ilə bildirdi.

Avqustun 30-u saat 07:20 radələrində Günay Məmmədova nişanlısı Rabil Rzayevlə birlikdə evlərindən çıxıblar. Onları Günayın atası Hüseyn Məmmədov yola salıb. Qız atasına nişanlısı ilə vacib məsələ barədə danışmalı olduqlarını deyib və uzağı 1 saata evə dönəcəklərini bildirib. Lakin getdikdən təxminən 1 saat sonra, saat 08:27 radələrində onun qəzaya uğraması barədə məlumat gəlib. Bu barədə ANS PRESS olaraq Günay Məmmədovanın yas mərasimində iştirak edərkən mərhumənin atası Hüseyn Məmmədov bildirib. Onun sözlərinə görə, qəza yerinə çatanda Günayın tanınmaz hala düşmüş meyidini görüb. Günayın nişanlısı isə hadisə yerində olmayıb. Hüseyn Məmmədovun sözlərinə görə, qızı Bakı Metropolitenində polis işləyən Rabil Rzayev ilə 8 aydı nişanlı olublar. Bir-birilərini sevirmişlər. Günayı işə də həmişə Rabil aparırmış.

“Qızım üçün maşın almışdım. Lakin bu yaxınlarda avtomobili satıb özünə torpaq almışdı. Sonradan həmin torpağı da satmışdı ki, özünə cehizlik alsın. Rabil Günayı heç vaxt tək buraxmazdı. Həmişə onu evdən işə, işdən evə maşınla aparardı.Bu qədər sevdiyi qızın ölüm xəbərini eşidən adam necə oldu ortaya çıxmadı. Bu məsələ mənə qaranlıq qalır”, - deyə Hüseyn Məmmədov bildirib.

Günayın anası Təhminə Məmmədova isə qızının toyuna hazırlaşarkən yasını edəcəklərinə heç ağıllarına gətirməyəcəklərini dedi. “Kəbin də kəsdirmişdilər. Qızım xoşbəxt olmağa layiq idi”, - deyən Təhminə xanımın gözlərində yaş donmuşdu. Üzündəki ifadəni, qəlbindəki yanğınını ifadə etməyə söz belə acızdır. Nə evdəki ağlaşmaya, nə qadınların ağısına, nə də verdiyim suallara 23 yaşlı qızını itirən ana heç bir reaksiya vermirdi.

Bu faciəvi hadisədən ən çox kədərlənənlərdən isə Günayın bibisi qızı Səbinə Novruzovadır. “Həmişə şəkil çəkdirməyi sevərdi. Həyatı rəngarən və maraqlı görürdü. Həm rəfiqələrinin, həm də iş yoldaşlarının yanında istək qazanmışdı. Günayın ölümündən çox, canından çox sevdiyi Rabilin onunla vidalaşmasına gəlməməsi idi. Halbuki, Günay nişanlısına görə ölməyə belə hazır idi. Rabil isə nə onu basdıranda, nə də yas mərasiminə gəldi. Görəsən Günaya bu qədər nifrət edirdi?”

Yas mərasimindən qayıdarkən Rabil Rzayevlə əlaqə saxlamaq istədik. Çox istərdik ki, nişanlısının ölümü ilə bağlı Rabil Rzayevin də fikirlərini öyrənk. Lakin Rabil telefonu cavab vermədi.