Elşad Xose ilə Oksananın toyudur - eXclusive Foto

Bir neçə saatdan sonra paytaxt restoranlarının birində tanınmış reper Elşad Xose ilə rəqqasə Oksana Rəsulova münasibətlərini rəsmiləşdirib, ailə həyatı quracaqlar.

Toya dəqiqələr qalmış bəzi təfərrüatları öyrənməyə müvəffəq olmuşuq. Etibarlı mənbə bildirir ki, səbəbkarların, eləcə də qonaqların təhlükəsizliyini qorumaq üçün özəl mühafizə xidmətinin nə az, nə çox - düz 60 əməkdaşı restoranda iş başında olacaqlar.

Məşhur cütlüyün toyu işıqlandırmaq istəyən media mənsubları ilə ortaq məxrəcə gələ bilməmələri də problem olaraq qalıb. Həm Elşad, həm də Oksana açıq şəkildə bildirirlər ki, toya videokamera və ya fotoaparatla gələn jurnalistlərdən bu aparatlar alınacaq. Çəkiliş aparılmasına icazə verməyən cütlük bunu belə izah edir: “Özümüz lazım olan kadrları KİV-ə verəcəyik”. Səbəbkarlar çəkinmədən bildirirlər ki, əgər hansısa jurnalist qadağanı pozaraq çəkiliş aparmaq niyyətinə düşərsə, mühafizəçilər hərəkətə keçib vəziyyəti nəzarətdə saxlayacaqlar.

Restoran fotoqraflarının öz işlərini görüb-görməyəcəkləri də sual altındadır. Öyrəndik ki, reper və rəqqasə dost bildiyi 3 fotoqrafı ən xoş günlərinə dəvət ediblər. Və çox güman ki, toyda foto çəkdirəcək qonaqlara şəkilləri bir neçə gündən sonra təqdim olunacaq.

Teleaparıcı İlahə Nizamiqızı və aktyor-şoumen Elnur Kərimovun idarə edəcəyi məclisdə sürprizlərin olub-olmayacağı haqqında heç bir məlumat verilmir.

Allah xoşbəxt eləsin!