Heyrətamiz doğuş Şotlandiyanın Langbank şəhərində gerçəkləşib

Şotlandiyada iki cüt əkiz oğlanları olan ailənin üçüncü əkizləri dünyaya gəlib. Lanqbank şəhərinin sakinləri Karen və Kolin cütlüyünün bu dəfə də əkiz qızlarının dünyaya gəlməsi onları qəzetlərin baş xəbərinə çevirib. Ailədə artıq Lyuis və Kayl adlı 14 yaşlı əkizlər, Fin və Cud adlı 12 yaşlı əkizlər var.

Ana Karen üçüncü dəfə də əkiz övladlarının dünyaya gəlməsinə heç özlərinin də əvvəl inanmadıqlarını deyir: "Həyat yoldaşım Kolinə bu dəfə də əkizlərimizin olduğunu ismarıcla yazdım, o da cavab yazdı ki, "Bu heç də gülməli deyil." Bir dəqiqə sonra zəng vurdu və eşitdiyinə inana bilmədi. Mənə deyirdi ki, bunun yalan olduğunu söylə, mənsə dedim "bu, həqiqətdir"." - sitatın sonu.

Ana əvvəllər 4 uşaqla evdən çıxmağının necə çətin olduğunu xatırlayaraq, bunun 6 uşaqla daha da çətin olacağını etiraf edir. Ayla və Rouan adı verilmiş əkiz qızların dörd böyük qardaşı isə ailədə 6 uşağın olmasının həyatlarında o qədər də böyük dəyişikliklərə yol açmayacağını düşünürlər.

Şotlandiyalı həkimlər isə bir ailədə 3 cüt əkiz övladın olmasının hər 500 min anadan birində rast gəlinən hal olduğunu bildirirlər.