“Azərenerji”: “Qış mövsümündə əhalini enerji ilə təmin etmək üçün heç bir problem olmayacaq”

 Ötən gün Mingəçevirdə İstilik Elektrik Stansiyasında ildırım vurması nəticəsində ölkənin enerji sistemində baş verən qəza bəzi çatışmazlıqları üzə çıxardı. Mütəxəssislər diqqəti qəza zamanı xüsusi obyektlərin də işıqsız qalmasına yönəldirlər.

Baş vermiş qəza nəticəsində ölkənin böyük hissəsinin işıqsız qalması elektrik enerjisi təchizatında təhlükəsizlik sisteminin düzgün işləməməsi məsələsini gündəmə gətirir. İqtisadçıların hesablamalarına görə, son illərdə elektrik enerjisi istehsal edən strukturlara təqribən 3,5 milyard dollar, elektrik paylayıcılara isə 1 milyard dollara yaxın investisiya qoyulub.

İqtisadçı Nazim Məmmədov hesab edir ki, “Azərenerji” ASC ilə Paylayıcı Elektrik Şəbəkəsi arasında münasibətlərin düzgün qurulmaması və idarəetmənin təkmil olmaması nəticəsində təxirəsalınmaz obyektlərdə saatlarla elektrik enerjisinin verilməməsi yolverilməzdir.

N. Məmmədov bildirib ki, təxirəsalınmaz obyektlərin özünün enerji təminatı, paylayıcı elektrik şəbəkəsi olmalıdır: “Müharibə şəraitində olan ölkəyik. Hətta 70 faiz işığın olmaması ucbatından elektrik enerjisinin bütün ölkə üzrə 30 faizi kifayət edərdi ki, Azərbaycanın bütün təxirəsalınmaz obyektlərini davamlı elektrik enerjisi ilə təmin etsin”.

“Azərenerji” Səhmdar Cəmiyyətinin rəsmisi Osman İlyasovun sözlərinə görə, 1981-ci ildə istifadəyə verilmiş Mingəçevir İstilik Elektrik Stansiyasında baş vermiş qəza nəticəsində zədələnmiş enerji bloklarının bərpası artıq başa çatıb və enerji ötürücüləri normal işini davam etdirir.

Onun sözlərinə görə, ildırımdan mühafizə 100 faizlik mühafizə demək deyil: “Müəyyən faiz ildırımın birbaşa vurması ehtimalı var. Bu hallar mövcuddur. Qalan hallarda əlbəttə ki, xətlərdə elektrik stansiyaları mühafizə olunur. “Azərenerji”nin qış mövsümündə əhalini enerji ilə təmin etməsi üçün tam əminliklə demək olar ki, heç bir problem olmayacaq”.

Qeyd edək ki, Mingəçevir İstilik Elektik Stansiyasını ildırım vurması nəticəsində 4 enerji paylayıcı blokunun sıradan çıxması ilə ölkənin 40 faizi bir neçə saat eletrik enejisiz qalmışdı.