Ocağın üstündə qaynamaqda olan yağın içində əyləşib, bütlərə ibadət etdi. Tailandda  bir rahibin qəribə şousu ölkədə böyük səs-küyə səbəb olub. Yağla dolu qaynar qazanın içində əyləşən rahib,  aşağıda körüklənən alova baxmayaraq heç nə olmayıbmış kimi, sakit tərzdə ibadət edir.  Bir müddət əvvəl lentə alınan görüntülərin yaratdığı rezonans isə   alimləriin işə qarışması ilə nəticələnib. Elm xadimləri, rahibin həqiqətən də qızmar yağın içində əyləşdiyinə şübhə ilə yanaşır.

Rahib ocağın üstündək qaynar qazanda meditasiya halındadır. O hərdən köməkçilərinin ona tərəf uzatdığı əşyalara əlini toxundurur. Tailandlılar düşünür ki,  rahibi öldürücü istlikdən ilahi qüvvələr qoruyur.  Hətta iş o yerə çatıb ki, sakinlər rahibin toxunduğu əşyaları baha qiymətə alırlar.

Əslində isə hər şey bəsit bir fırıldaqdan da ibarət ola bilər. Professor Cesada Boripantın fikrincə   yağla dolu olan qazan ocağın üstündə olsa da, əslində həmin yağ heç isinməyib. Yağın səthində peyda olan qabarcıqlar isə onun qaynadığından xəbər vermir.  Qazanın dibinə bir az su töküb, üstünə yağ əlavə etdikdə, məhz həmin su qabarcıqları qazanın üzünə qalxaraq, insanlarda yağın qaynadığı təəssüratı yaradır.

Amma elm xadiminin bu açıqlaması radikal bütpərəstlərin ürəyincə olmayıb.  Onların fikrincə professorun nəzəriyyəsi  minillərdir mövcud olan mistik qüvvələrə qara yaxmaqdan başqa bir şey deyil.