Son günlər sosial şəbəkələrdə yol polisi əməkdaşları ilə mübahisə yaşayan sürücülər tərəfindən çəkilən videomateriallar yayılmaqdadır. Maraqlıdır ki, həmin videoların demək olar ki, hamısında sürücülər haqlı çıxır. 

 Videomaterialda da sürücü yol polisi əməkdaşı ilə bir qədər rəsmi və “qanunun dili” ilə danışmağa çalışır ki, bu da sonda yol polisi inspektoru Məhəmməd Zeynalovun geri çəkilməsi ilə nəticələnir.

Sürücünü qadağan olunmuş yerdə ötmə əməliyyatı apardığı və sürət həddini aşdığı üçün saxladığını deyən yol polisi əməkdaşı xeyli çək-çevirdən sonra ondan sənədləri alır və uzaqlaşır. Bir qədər sonra isə geri qayıdıb “xəbərdarlıq etdim” deyərək heç bir inzibati protokol tərtib etmədən sənədləri sürücüyə qaytarır. 

Hiss olunur ki, yol polisi əməkdaşı onun videosunun çəkildiyini başa düşür və “yerə düş, sözüm var” deyərək sürücünü maşından düşməyə dəvət edir. Lakin sürücü heç bir halda onun tələbini yerinə yetirmir. 

Zeynalov səhv etdiyini, kamera görüntüsü deyilən faktın olmadığını görüb heç bir tədbir görmədən sənədləri geri qaytarır.