Bakı Dövlət Universiteti metroda özünü qatarın altına atan tələbəsi ilə bağlı açıqlama yaydı.
Universitetin mətbuat və informasiya şöbəsinin rəhbəri Pərvanə İbrahimovanın Milli.Az-a verdiyi məlumata görə, müvafiq strukturların araşdırmasından məlum olub ki, Bakı Metropoliteni "Ulduz” stansiyasında qatarın altına yıxılan gənc universitetin Sosial Elmlər və Psixologiya fakültəsinin Sosiologiya ixtisasının 1-ci kurs tələbəsi Həsənov Dövran Mübariz oğludur.

Elmi-Tədqiqat Travmatologiya və Ortopediya İnstitutunun reanimasiya şöbəsinə yerləşdirilən Həsənov Dövran fakültə və tələbə yoldaşları tərəfindən sakit tələbə kimi xarakterizə olunur. Tələbə yoldaşlarının bildirdiklərinə görə, o, 2013-2014-cü tədris ilinin 1-ci semestrində bütün dərslərdə iştirak etsə də, 2-ci semestrdə (fevralın 17-dən) dərslərə gəlməyib. Dövran Həsənovun ailə problemi olub və baş vermiş hadisə də bununla bağlı ola bilər.

Tələbə yoldaşları onun psixoloji problemlərinin olduğunu və psixoloq yanında müalicə aldığını da bildirirlər. Tələbə yoldaşları, universitetin prorektoru, fakültənin dekanı, dekan müavinləri və əməkdaşlar bir neçə dəfə xəstəxanada onu ziyarət ediblər. Xəstə ilə intensiv əlaqə saxlanılır.

Azad.Az Milli.Az-a istinadən xəbər verir ki, D.Həsənovun ailəsində ciddi problem olub. Atası ilə anası bir müddət əvvəl ayrılıblar. Sonradan isə atasının itkin düşdüyü bildirilir.