Azərbaycan estradasında sevilib-seçilən Röya Ayxan “Kanal S”in efirində yayımlanan “Gəlin danışaq” verilişinin aparıcısı Sənubər İsgəndərliyə şokedici etiraflar edib.

O bildirib ki, Azərbaycanı bir dəfə tərk edib həmişəlik xarici ölkələrdən birinə köçmək istəyib. Hətta bu məqsədlə Türkiyədə ev də alıb. Lakin ailəsinə olan sevgi bunun qarşısını alıb və o qayıdıb. Hazırda yaxınlarının gələcəyi üçün çalışan Röya yaxın bir-iki ildə Azərbaycanı tamamən tərk edəcəyini və Türkiyə ilə yanaşı, Rusiya şou-biznesinə də qatılacağını vəd edib. Müğənni hazırda Vətənində bir neçə işini yekunlaşdırmaq üzərində çalışır və bundan sonra isə xaricə yola düşəcək.

Eyni zamanda, Röya deyib ki, televiziya kanallarından da çox gileylidir və çalışır verilişlərə qatılmasın. Səbəbi isə orada yaradılan şəraitdən narazı olmasıdır. “Mən sənət göstərmək istəyirəm, şou göstərmək istəyirəm. Amma kanallarda bu cür verilişlərlə problemlər var. Normal işıqlandırma cihazları da yoxdur. Hansı verilişə qatılırsan, dərhal başlayırlar şəxsi həyatı qurdalamağa və ya eyni sualları verirlər. Ona görə də son zamanlar çox nadir hallarda məni telekanalların efirində görərsiz”, - deyə Röya vurğulayıb.