Milli.Az Day.Az-a istinadən bildirir ki, müğənni Mətanət İskəndərlinin qızı Ülkər Space telekanalının «Plus-minus» verilişində anası barədə sualları cavablandırıb. 

- Ulduz övladı olmağınızın müsbət tərəfləri hansıdır? 

- Müsbət cəhəti odur ki, haraya gedirəmsə, mənə hörmətldə yanaşırlar. Anamın tanınmış adam olması ilə fəxr edirəm. Bircə mənfi tərəfi var ki, harayasa istirahətə gedəndə bizi tanıyırlar, onda narahat oluruq. 

- Ananızın məşhurluğu məktəbdə köməyinizə çatıb? 

- Əlbəttə, məktəbdə də, universitetdə də müəllimlər mənə hörmət edirdilər, kömək göstərirdilər. 

- Ananızın sizə verdiyi ən böyük cəza yadınızdadır? 

- Bir dəfə anam məndən bərk incidi və bir həftə danışmadı mənimlə. Bilmirəm, nəyə görə küsmüşdük. Mən çox qürurluyam, ona görə gözləyirdim ki, birinci addımı anam atsın. Sonra biz barışdıq, amma o hadisəni unutmadım. 

- Niyə ananızın yolu ilə getmədiniz? 

- Çünki səsim yoxdur. İstəmirəm ki, sonra bunu mənə irad tutsunlar. Hətta səsim olsa belə, anam oxumağıma icazə verməzdi, çünki özü keçdiyi çətinlikləri mənə rəva bilmir. 

- Mətanət İskəndərli barədə hansı şayiə sizi daha çox təəccübləndirib? 

- Guya biz Azərbaycanı tərk edirik xəbəri. Hamı məndən bu barədə soruşurdu. 

- Ananıza nəyi heç vaxt bağışlamazsınız? 

- Belə bir şey mümkün deyil.