Xalq artisti Səməd Səmədovla müğənni Nadir Qafarzadənin itlərinə toy edib, guya quda olacaqları xəbəri yerli mətbuatın diqqətini cəlb edib. Bu “izdivac”ı qınayan insanlara Nadir Qafarzadədən daha bir olay yaradacaq açıqlama gəldi.

SİA-ya eksklüziv açıqlama verən müğənni çox iddialı danışaraq bildirib ki, “əjdaha” itinə toy etdikdən sonra digər heyvanları üçün də “nikah” mərasimi düzənləyəcək: “Bundan sonra pişiyimə toy edirəm. İtimə İngiltərədən eksklüziv gəlinlik gətirəcəm..Ardınca inəyimə, sonra toyuqlarımla qoyuqlarıma da toy edəcəm. Ancaq burada yox, xaricdə. Üstəlik, bu dəfə qohumluğum yerli müğənnilərlə deyil, xarici ulduzlarla olacaq. Azərbaycandan isə heç kimi o tədbirə dəvət etməyəcəm. Çünki onlar mənim səviyyəmdə deyillər”.

“Od püskürən” Nadir sonda daha bir yaddaqalan açıqlama verdi: “Bəli, evləndirdiyim it mənim oğlumdur. Bəzi “heyvanabənzər” insanlardan daha üstündür. Sonda burdan hər kəsə səslənirəm ki, mən it oynadan Nadirəm. Çünki mənim sözümlə hər kəs oynayır”.