Azərbaycan şou-biznesində əcnəbi vətəndaşlarla ailə quran məşhurlar çoxdur. Amma onların içərisində demək olar ki, bir çoxu qardaş ölkə, yəni türkiyəli vətəndaşlarla evlidir. Qeyd edək ki, yalnız qadınlar yox, elə kişilərin arasında da əcnəbilərlə evlənənlər var.

Modern.az xarici vətəndaşlarla ailə quran məşhurları oxuculara təqdim edir.

Azərbaycan Dövlət Opera və Balet Teatrının solisti Fidan Hacıyeva ingiltərəli Filipp Neylor ilə ailəlidir. Fidan xanımın 2 övladı var – Corcina-Xəyalə-Siena və David-Davud-Con.

Digər bir müğənni İradə İbrahimova 2009-cu ildə türkiyəli biznesmen Ceyhun İzzətlə ailə qurub. Cütlüyün İpək adlı bir qızı var.

Müğənni Yeganə 2010-cu ildə Fateh adlı Türkiyə vətəndaşı ilə ailə qurub, Bakının “Neolit” restoranında toyları olub. Müğənninin Ömər adlı bir oğlu var.

Gənc caz müğənnisi Ülviyyə Rəhimova da əcnəbi vətəndaşla evlidir. O, Ceyk Cons adlı vətəndaşla ailə qurub.

“Eurovision–2011” mahnı müsabiqəsinin qalibi Nigar Camal da əcnəbi vətəndaşla ailə quran məşhurların arasındadır. O, Kipr türkü vətəndaş Halukla ailəlidir. Onların 2 qızı var.

Müğənni Səidə Dadaşova da türkiyəli biznesmen Selcuk Sami Gökgözlə ailə qurub. Amma son vaxtlar mətbuatda cütlüyün boşanmaları barədə xəbərlər var.

Bəstəkar-prodüser İsa Məlikov Polşa əsilli Paulina Volotkovskaya ilə ailə həyatı qurub.

Məşhur balaban ifaçısı Əlixan Səmədov Türkiyə vətəndaşı ilə evli olub, ayrılıb.

Azərbaycanlı model Günay Musayeva da türkiyəli vətəndaşla ailə quran məşhurlardandır. O, aktyor Tolqa Karellə ailə qurub və bir oğlu var.

Siyahıda bizim bilmədiklərimiz məşhurlar da yəqin çoxdur...

Sevinc İltifatqızı