Qonaq sənətçi səhnəyə çıxmazdan öncə xalq artisti Alim Qasımov və qızı Fərqanə Qasımova ifaları ilə hər kəsdə xoş əhval-ruhiyyə yaradıb. Tədbirin aparıcıları şoumen Murad Dadaşov və telejurnalist Nərgiz Cəlilova olublar. İlk olaraq tamaşaçılar sözləri Cəlal Qurbanova, musiqisi Gövhər Həsənzadəyə məxsus olan “Sən azərbaycanlısan” mahnısının klipini izləyiblər və milli rəqs qrupu gələn qonaqları əyləndirib. Daha sonra Mustafa Ceceli səhnəyə çıxıb. Həyəcanlı olduğunu dilə gətirən müğənni ifasına “Es” mahnısı ilə başlayıb.
Bundan sonra Mustafa Ceceli tamaşaçılarla birgə ilk mahnısı “Unutamam”ı ifa edib. Müğənni konsert müddətində musiqi alətlərində ifa etməsi ilə seçilib. Bundan başqa o, Azərbaycan rəqslərindən müxtəlif nümunələr nümayiş etdirməyə çalışıb. Tədbirdə maraqlı məqamlardan biri də Fəxriyyə Xələfovanın Mustafaya ətir hədiyyə göndərməsi olub. Anşlaq yaşanan tədbirdə daha bir sürpriz gecənin sonunda olub. Belə ki, Azərbaycan xalq mahnısı “Tar kamanım”ı ifa edən Mustafa Ceceli gurultulu alqışlarla qarşılanıb. Digər türkiyəli və əcnəbi ifaçılardan fərqli olaraq, Mustafa mahnının sözlərini təhrif etmədən azərbaycan dilində səlis şəkildə ifa edib. Tədbirə gələnlər arasında əməkdar artist Elza Seyidcahan, müğənnilər Səidə Sultan, Günay İbrahimli, Ruhəngiz Allahverdiyeva, Aysel Əlizadə, teleaparıcı Murad Arif, aktyor Rafael İsgəndərov və başqaları olub. Gecənin sonunda Alim Qasımov, Fidan və Xuraman Qasımova bacıları, Zülfiyyə Xanbabayeva və Mustafa Ceceli birlikdə “Sən Azərbaycanlısan” himnini səsləndiriblər. Mahnı oxunarkən hər kəs ayaq üstə qalxaraq Azərbaycan bayrağını dalğalandırıb.

Şəkilləri böyütmək üçün klik edin.