Havaların istiləşməsi ilə Dənizkənarı Milli Parka üz tutan insanların da sayı çoxalıb. Paytaxt sakinləri və şəhərin qonaqlarının bir hissəsi istirahətlərini dəniz kənarında keçirməyə üstünlük verirlər.

Son illərdə bulvarda attraksionların, kafelərin və səyyar ticarət və xidmət obyektlərinin sayı getdikcə artır. Qiymətlər də sabit qalmır, əsas məqsəd tezliklə çoxlu pul qazanmaqdır. Maraqlıdır ki, bu attraksionların sayı nə qədər artsa da, heç biri müştəri sarıdan korluq çəkmir.

Parkda yeni elektrobuslar, faytonlar, dəniz gəmiləri və sair gəzinti marşrutları işləyir. Səyyar fotostudiyalar, kiçik ticarət köşkləri, müasir kafelər və s. istirahət və əyləncə mərkəzləri fəaliyyət göstərir.

Parkda apardığımız müşahidələr göstərdi ki, insanların çoxu burada asudə vaxtlarını yalnız gəzmək və ya skamyada əyləşib söhbət etməklə keçirirlər. Bunun əsas səbəbi bulvardakı xidmətlərin şəhərin başqa yerlərinə nisbətən xeyli yüksək olmasıdır.

Düzdür, bu obyektlər müştəri sarıdan korluq çəkmir, amma faktdır ki, bu xidmətlərdən əhalinin böyük hissəsinin yararlanmaq imkanı yoxdur. Söhbət etdiyimiz şəhər sakinləri bulvarda bütün şəraitdən razı qaldıqlarını bildirsələr də, yalnız bahalıqdan gileyləndilər. Onların sözlərinə görə, uşaqların ən sevdiyi məkan da buradır. Ona görə gəlməyə məcbur qalırlar.

Hər dəfə əsəbləri korlayan istirahət…

Bulvarda insan sıxlığı adətən axşam saatlarına təsadüf edir. Sat təxminən 6-dan sonra restoran və kafelərin əməkdaşları stol-stullarını ağaçların yanına düzürlər.
Öncələr olduğu kimi, indi də Dənizkənarı Milli Parkda çayı sadəcə, qəndlə içmək mümkün deyil. Müştəri istədi-istəmədi qəndin yanında mütləq şokolad, mürəbbə sifariş verməlidir. Əks halda, müştəri çay içə bilməyəcək. Bəzi yerlədə ümumiyyətlə, minimum 10-20 manatlıq sifariş vermənizi tələb edirlər. Bunu əsassız hesab etdikdə, xidmətçilərdən “bu, bizim servisdir” cavabını eşitmək olur.

“İstirahət etmək istəyirik, ancaq hər dəfə istirahət əvəzinə əsəblərim korlanır. Biz bir çaynik çay sifariş veririk, bir də görürük ki, çaydan əlavə istənilməyən şeylər gətirilib. Qaytarmaq da olmur. Deyirlər ki, mütləq almalısız. Duranda da ən azı 10 manat hesab çıxır. Bulvardakı qiymətlər nəinki qonşu ölkələr, hətta Avropanın əksər dövlətlərindəki taariflərlə də müqayisəyə gəlmir. Bulvarda təklif edilən əsas xidmətlər maya dəyərindən bir neçə dəfə bahadır. Şəhərin bütün ərazilərində standart qiymətə təklif edilən su və meyvə şirələri də burada ikqat baha təklif olunur» deyə paytaxt sakini Əli bildirir.

Qiymətlər...

İstirahətə gələn insanlara təklif olunan xidmətlərin və qiymətlərin bir qismini təqdim edirəm:

Dönər:

Toyuqla-1.50 AZN
Ətlə- 1.60 AZN
Lavaş-2.00 AZN

İçkilər:

Meyvə şirəsi: 5.00 AZN
Red Bull-2.50 AZN-lə 4.00 AZN arasında
Ayran-0.60 AZN
Dondurma 1 AZN
Popkorn-1.00 AZN
Pambıq-1.00 AZN

Coca-Cola, Sprite, Fanta 0.5 litri 60 AZN (baxmayaraq ki, su qablarının üzərinə 40 qəpik yazılıb)

Əyləncə xidmətləri:

7D Sinema- 1nəfər 5 AZN
8D Tir- 1 bilet 5 AZN
Qorxulu Ev- 1 nəfər 5 AZN
Meymunla şəkil çəkdirmək - 5 AZN
Dəniz gəzintisi- 1 nəfər (30 dəqiqə) 3 AZN
Velo Motesklet yarışması (uşaq oyunu)- 1nəfər 1 AZN
Labirint- 1 nəfər 2 AZN

Velosiped sürmək qadağası

Bakı bulvarı həm də qəribə qadağaları ilə adamları təəccübləndirir. Bunlardan biri səhər saat 9-dan sonra velosipedlə hərəkət etməyə qoyulan qadağadır. Velosiped həvəskarları üçün Bakıda bulvardan ideal yer ola bilməz. Avtomobil hərəkətinin olmadığı, dəniz kənarında yerləşən ərazidə təmiz hava udaraq, velosiped sürməkdən yaxşı nə arzulamaq olar?!. Amma bu qadağanı qoyanlar üçün insanların arzuları əhəmiyyət kəsb eləmir.

Digər tərəfdən inteqrasiya etdiyimiz Avropada velosipedə verilən üstünlüyü, velosipedlər üçün xüsusi yollar, hətta işıqforlar quraşdırıldığını nəzərə alsaq, bir daha bu qadağanın nə qədər absurd olduğu qənaətinə gələrik. Hazırda bulvar istirahət, biznes və əyləncə sektorlarına bölünüb. Bu sırada pulsuz idman qurğuları yaddan çıxıb. Bir neçə il bundan əvvəl bulvarda futbol, voleybol, basketbol oynamaq istəyənlər üçün xüsusi pulsuz meydança var idi ki, bu da çox adamı ora cəlb edirdi. Həm də idmanın, sağlam həyat tərzinin təbliğatına töhfəsini verirdi. Orada baş tutan oyunlara tamaşaçı marağı da var idi. Amma nə olsun, bulvardan milyonlar qazananlar üçün pulsuz xidmət anlayışı mövcud deyil.