Avstraliyanın Sidney universitetində alimlərin apardığı araşdırmaya görə, Kompüter qarşısında insan nə qədər çox oturarsa, o qədər çox tibbi problemlərlə üzləşər.

Alimlər 45 yaşdan yuxarı və gündə 11 saatdan çox oturan şəxslərin 3 il ərzində ölüm riski ilə üzləşdiyini bildirib.

Avstraliya alimlərinin araşdırmasında 200 min adam iştirak edib. Onlardan gün ərzində neçə saat oturduqları soruşulub. Məlum olub ki, yaşı 45-dən çox olan və gündə 11 saat və daha çox oturan insanlar 3 il içərisində ölmə riski ilə qarşılaşır, bu isə gündə cəmi 4 saat oturanların qarşılaşdıqları ölüm riskindən 40 faiz çoxdur. Alimlərin fikrincə, mütəmadi olaraq idmanla məşğul olan insanlarda belə həddindən çox oturmaq xolesterolun səviyyəsinin yüksəlməsinə, ürək-damar xəstəliklərinin artmasına səbəb olur. Çox oturan insanlarda şəkərli diabet xəstəliyinə tutulmaq riskinin də yüksək olduğu bildirilir.

Araşdırma, Amerika "Archives of Internal Medicine" jurnalında nümayiş olunub. Məqalə, Fransanın "Le Figaro" qəzetinin internet saytında da yerləşdirilib.