Ermənistana gedən yığmamız bəlli oldu

Azərbaycanın gənclərdən ibarət boks yığması noyabrın 25-də Ermənistanda start götürəcək Avropa çempionatında iştirak edəcək.

Yığmamızın İrəvana hansı heyətlə gedəcəyi bəlli olub.

Komandamız İrəvana bütövlükdə 10 nəfərlik nümayəndə heyəti ilə yolla düşəcək. Onlardan altısı - Tural Əhmədov (52 kq), Nəsrəddin Məmmədov (56 kq), Pərviz Bağırov (64 kq), Saqi Salehli (69 kq), Orxan Mayıllı (75 kq), Rauf Rəhimov (81 kq) məhz boksçudur. 

Məlumat üçün bildirək ki, Avropa çempionatı noyabrın 25-dən dekabrın 8-dək davam edəcək.

Türk hakim klublararası dünya çempionatında

 Türkiyənin son illər ən uğurlu hakimi sayılan Cüneyt Çakır daha bir mötəbər yarışa təyinat alıb.

Qol.Az-ın Türkiyə Futbol Federasiyasının rəsmi saytına istinadən verdiyi məlumata görə, Çakır FİFA tərəfindən Yaponiyada təşkil olunacaq klublararası dünya çempionatının oyunlarını idarə edəcək.

Dekabrın 6-da başlanacaq çempionata o, köməkçiləri Bahattin Duran və Tarık Ongünlə birgə yollanacaq. Avropa qitəsini yalnız Türkiyəli hakimlər briqadası təmsil edəcək.

Qeyd edək ki, dekabrın 16-dək davam edəcək dünya çempionatına “Çelsi” (İngiltərə), “Monterrey” (Meksika), “Korintians” (Braziliya) və “Oklend” (Yeni Zelandiya) komandalarının qatılacaqları dəqiqdir. Qalan klublar isə Asiya, Afrika və Yaponiya təmsilçiləri olacaqlar.

  Gəncədə Azərbaycan və Fransa güləşçiləri güclərini sınayıblar

 Gəncə Olimpiya İdman Kompleksində Azərbaycanın Naftalan və Fransanın Leql şəhərlərindən olan güləşçilər güclərini sınayıblar.

Yarış dostluq münasibəti ilə təşkil edilib. Bu barədə Gəncə Olimpiya İdman Kompleksindən verilən məlumata görə, yarışda Fransadan olan heyətdə 6 qız və 7 oğlan idmançı iştirak edib.

Bu turnirin ölkələr arasında dostluq münasibətlərinin inkişaf etməsinə daha da təkan verə biləcəyi vurğulanıb.

Çıxış edən Gənclər və İdman Nazırliyinin baş məsləhətçisi Tofiq Eyvazov bildirib ki, bu yarışın Azərbaycan və Fransa arasında dostluğun inkişaf etdirilməsi baxımından böyük əhəmiyyəti var.

Məlumatda qeyd edilib ki, qızların görüşü 3:3 hesabı ilə yekunlaşsa da, oğlanların mübarizəsi 3:4 hesabı ilə qonaqların xeyrinə nəticələnib.