İttihama görə, bu il fevralın 29-da Ə. Qarayev adına 2 saylı Uşaq Klinik Xəstəxanasında Abşeron rayon sakini, 1 yaşlı Elmir Mehdiyev ağır bədən xəsarətləri və yanıqlardan dünyasını dəyişib.

Rayonun təhqiqata başlayan polis və prokurorluq əməkdaşları aydınlaşdırıblar ki, fevralın 5-dən 29-dək Z.Məmmədova Xırdalan şəhərində yaşayan 3 yaşlı Aişə Mehdiyevaya və onun qardaşı, bir yaşlı Elmirə qulluq edib.

Təqsirləndirilənin sözlərinə görə, Elmir narahat uşaq olub, tez-tez onu narahat edib, ağlayıb. Fevralın 16-dan 28-dək dayə zəif və ağlayan uşağı əlləri və televizorun pultu ilə amansızlıqla döyüb.

O, ifadəsində bildirib ki, uşağı sakitləşdirmək və qorxutmaq üçün bir neçə dəfə hətta alışqandan da istifadə edib. Fevralın 29-da uşağın vəziyyəti kəskin pisləşib.

Bundan qorxan Z.Məmmədova və onun mənzil kirayələdiyi evin sahibləri Elmiri Xırdalan şəhərinin uşaq xəstəxanasına aparıblar, buradan isə körpə “Təcili yardım” maşınında paytaxtın Ə.Qarayev adına 2 saylı uşaq xəstəxanasına gətirilib.
Elmir orada dünyasını dəyişib. Onun ölümünə kəllə-beyin travması nəticəsində beyinə qan sızması səbəb olub. Uşağın ölümü barədə öyrənən anası polisə məlumat verib.

Martın 2-də Abşeron rayon məhkəməsi Z.Məmmədovanın barəsində həbs qəti imkan qərarı qəbul edib, rayon prokurorluğu Cinayət Məcəlləsinin 126.3 maddəsi üzrə cinayət işi qaldırıb.

Bu cinayət işi üzrə aparılan məhkəmə araşdırması zamanı Z. Məmmədovanın günahı sübuta yetirilib və o, 11 il azadlıqdan məhrum edilib.