Sentyabrın 29-da dahi Azərbaycan şairi və mütəfəkkiri, dünya poeziyasının günəşi Nizami Gəncəvinin vətəni Gəncədə böyük izdiham yaşandı.
AzərTAc xəbər verir ki, burada bütün işıqlı ömrünü Gəncədə keçirməklə dünya poeziya xəzinəsinə əvəzsiz incilər bəxş edən dahi şairin 870 illik yubileyi böyük təntənə ilə qeyd edilmişdir.

Azərbaycan Respublikasının Prezidenti İlham Əliyevin “Dahi Azərbaycan şairi və mütəfəkkiri Nizami Gəncəvinin 870 illik yubileyinin keçirilməsi haqqında” 2011-ci il 23 dekabr tarixli Sərəncamından dərhal sonra Gəncədə geniş hazırlıq işləri aparılmışdır. Şairin məqbərəsi və onun ətrafı yenidən qurulmuş, sahəsi genişləndirilərək yeni xiyabanlar salınmışdır. Burada Nizami Gəncəvi muzeyinin inşasına başlanılmış, Nizami Gəncəvi Beynəlxalq Mərkəzinin inşası üçün hazırlıq işləri aparılmışdır.

Dövlətimizin başçısının müvafiq Sərəncamından irəli gələn vəzifələrə uyğun olaraq alimlərdən və ziyalılardan ibarət yubiley komissiyası yaradılmış, görülən işlər demək olar ki, hər gün müzakirə edilmişdir. Bir sözlə, bütün Gəncə və gəncəlilər Azərbaycanın fəxri olan dahi şairin yubileyinə geniş hazırlıq işləri ilə gəlmişlər.

Gəncədə yubiley tədbirləri ümummilli liderimiz Heydər Əliyevin abidəsini ziyarətlə başlamışdır. Qonaqlar və şəhər ictimaiyyətinin nümayəndələri ulu öndərin abidəsi önünə gül dəstələri qoyaraq, müstəqil Azərbaycan dövlətinin memarı və qurucusu olan bu dahi şəxsiyyətə ehtiramlarını bildirmişlər.

Yubiley tədbiri dahi şairin məqbərəsi önündə davam etdirilmişdir. Burada tədbir iştirakçılarını şərbətlə qarşılayan milli geyimli məktəblilər müxtəlif dillərdə dahi şairin əsərlərindən parçalar söyləmiş, qonaqları qədim Azərbaycan rəqsləri ilə salamlamışlar. Sonra Nizami Gəncəvinin sözlərinə bəstələnmiş romansların müşayiəti ilə yubiley tədbirləri davam etdirilmişdir.

Minlərlə şəhər sakininin qatıldığı mərasimdə Azərbaycan Respublikası Baş nazirinin müavini Elçin Əfəndiyev, mədəniyyət və turizm naziri Əbülfəs Qarayev, Azərbaycan Milli Elmlər Akademiyasının prezidenti Mahmud Kərimov, təhsil naziri Misir Mərdanov, Azərbaycan Yazıçılar Birliyinin sədri Anar, Milli Məclisin deputatları, xarici ölkələrin Azərbaycandakı diplomatik korpuslarının nümayəndələri, 14 ölkədən dəvət olunmuş 150-dən artıq alim iştirak etmişdir.

Tədbiri giriş sözü ilə Gəncə Şəhər İcra Hakimiyyətinin başçısı Elmar Vəliyev açaraq qonaqları salamlamış, Azərbaycan Respublikasının Prezidenti İlham Əliyevin dahi şair və mütəfəkkir Nizami Gəncəvinin 870 illik yubileyi ilə bağlı müvafiq Sərəncamının əhəmiyyətindən danışmış və xalqımızın mədəni irsinə göstərdiyi diqqət və qayğıya görə dövlətimizin başçısına gəncəlilər adından minnətdarlığını bildirmişdir.

Baş nazirin müavini Elçin Əfəndiyev bu böyük bayram münasibətilə bütün gəncəliləri, eləcə də dahi Nizami yaradıcılığının işığına yığılan qonaqları təbrik etmişdir. Elçin Əfəndiyev demişdir ki, Nizaminin bu gün başlayan yubiley tədbirləri yalnız poeziya, mədəniyyət bayramı deyildir. Nizaminin yubileyi sözün əsl mənasında ümumxalq bayramıdır. Çünki 870 ildir ki, Nizaminin sənəti, onun özü Azərbaycan xalqı ilə birlikdədir. Nizami Gəncədə doğulmuş, Gəncədə yaşamış və Gəncədə də vəfat etmişdir. Ancaq onun sənətinin, istedadının miqyası o qədər böyükdür ki, o, bütün bəşəriyyətin övladı oldu. Nizami nə qədər milli şairdirsə, o qədər də bəşəri şairdir. Nizami doğulduğu Gəncəni sənətkarlar diyarı adlandırır, özünü isə mahir sənətkar hesab edirdi. O, Gəncəni qədim Babillə müqayisə edirdi. Bu sözlər başqa bir dahi sənətkarın dilindən eşidilsəydi, bəlkə də bir qədər qeyri-təvazökar səslənərdi. Lakin Nizaminin dediyi bu sözlər son dərəcə təbii səslənir. Ona görə ki, Nizami istedadının böyük imkanları ilə Nizami sənətkarlığının iddiası tam şəkildə üst-üstə düşür. Mənim yaxşı yadımdadır. Ümummilli liderimiz Heydər Əliyev Nizaminin 840 illiyi ilə əlaqədar xüsusi Sərəncam imzalamışdı. Son dərəcə qiymətli olan bu Sərəncam Azərbaycan xalqı üçün mühüm əhəmiyyət kəsb edirdi.

Hamı yaxşı bilir ki, yubileylər yuvarlaq rəqəmlərlə olur. O vaxt ulu öndərin təşəbbüsü ilə böyük Nizaminin 840 illik yubileyinin keçirilməsinə sovetlər birliyində qısqanclıqla yanaşırdılar. Lakin bu, böyük bir hadisə idi və şübhəsiz ki, bu hadisə ulu öndərin şəxsiyyətinin gücü sayəsində mümkün olmuşdu. Nə yaxşı ki, bu ənənə indi də davam edir. Nə yaxşı ki, bu estafet Azərbaycanın müstəqilliyinə qədər gəlib çıxmışdır. Sevinirik ki, bu gün Azərbaycan Prezidenti bu ənənələrə sadiq qalaraq Nizami şəxsiyyətinə ümumxalq məhəbbətinin ifadəsi olaraq dahi şairin 870 illik yubileyinin keçirilməsi barədə xüsusi Sərəncam imzalamışdır.

Mərasim başa çatdıqdan sonra qonaqlar və yubiley iştirakçıları dahi söz ustadının qəbrini ziyarət edərək məzarı üzərinə qızılgüllər qoymuş, ruhuna dualar oxumuşlar.

Sonra məqbərə ətrafında Gəncə Dövlət Dram və Kukla teatrları aktyorlarının şairin “Sirlər xəzinəsi”, “Xosrov və Şirin”, “Leyli və Məcnun”, “İsgəndərnamə” və “7 gözəl” əsərlərinin motivləri əsasında hazırladıqları ədəbi-bədii kompozisiyalar nümayiş etdirilmiş, Gəncə Dövlət Filarmoniyası və Dövlət Kamera Orkestrinin birləşmiş xorunun, eləcə də müğənnilərin ifasında Nizaminin sözlərinə bəstələnmiş romanslar səsləndirilmişdir. Məqbərə ətrafında gəzintidən sonra burada xatirə şəkli çəkdirilmişdir.

Sentyabrın 29-da yubiley tədbirləri çərçivəsində Gəncənin mərkəzində Nizami Gəncəvi adına piyada keçidinin açılışı olmuş, Azərbaycan Dövlət Aqrar Universitetində Nizami Gəncəvi irsinin təbliğində xidmətlərinə görə yubiley tədbirlərinin iştirakçısı olan xarici ölkələrin bir qrup elm xadiminə Azərbaycan Dövlət Aqrar və Gəncə Dövlət universitetlərinin fəxri doktoru adının verilməsi mərasimi keçirilmişdir.

Mərasimdə Azərbaycan Dövlət Aqrar Universitetin rektoru, professor Mirdamət Sadıqov və Gəncə Dövlət Universitetinin rektoru, professor Elman Məmmədov rəhbərlik etdikləri universitetlərin elmi şuralarının qərarlarını oxumuş və dünyanın ən qədim və zəngin İsgəndəriyyə Kitabxanasının direktoru, Misir Elmlər Akademiyasının prezidenti, BMT baş katibinin Sivilizasiyalar Alyansı üzrə səfiri, doktor İsmayıl Seragəldiyə və BMT-nin Hökumət Komissiyasının sədri, İsveçrə Konfederasiyası Prezidentinin müşaviri, İsveçrənin sabiq dövlət naziri, UNESCO-nun kommunikasiya üzrə hökumətlərarası panelinin sədri, səfir Valter Fusta Azərbaycan Dövlət Aqrar Universitetinin, Latviyanın 6-cı Prezidenti, BMT baş katibinin xüsusi təmsilçisi, Avropa İttifaqının uzunmüddətli inkişaf proqramının vitse-prezidenti Vaira Vike-Freibergaya və Qırğız Respublikasının sabiq xarici işlər naziri və müvəqqəti hökumətin rəhbəri Roza Otunbayevaya Gəncə Dövlət Universitetinin fəxri doktoru adı verilməsi barədə həmin universitetlərin diplomları təqdim edilmişdir.

Fəxri doktor adına layiq görülmüş qonaqlar diqqət və qayğıya görə minnətdarlıq etmişlər.
Təhsil naziri Misir Mərdanov fəxri doktor adına layiq görülmüş qonaqları təbrik etmiş, bunu əlamətdar hadisə adlandırmışdır.

Universitetdə keçirilən təntənəli mərasimdən sonra Xan bağında Nizami Gəncəvi Beynəlxalq Mərkəzinin təməlqoyma mərasimi keçirilmişdir. Mərasimdə Gəncə Şəhər İcra Hakimiyyətinin başçısı Elmar Vəliyev, Baş nazirin müavini Elçin Əfəndiyev, mədəniyyət və turizm naziri Əbülfəs Qarayev və Azərbaycan Yazıçılar Birliyinin sədri Anar çıxış edərək təməli yenicə qoyulan Nizami Gəncəvi Beynəlxalq Mərkəzinin işinə uğurlar arzulamışlar.

Təməqoyma mərasimindən sonra Heydər Əliyev Mərkəzində Nizami Gəncəvinin poemalarının yeni tərcümə və tərtibatda nəşr olunmuş nüsxələrinin təqdimatı keçirilmişdir.
Mərasimdə çıxış edən Gəncə Şəhər İcra Hakimiyyətinin başçısı Elmar Vəliyev dahi şairin yubileyi münasibətilə Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə ilk dəfə olaraq “Xəmsə”yə daxil olan 5 əsərin külliyyat şəklində çap edilməsindən danışmış və buna görə Azərbaycanın birinci xanımına minnətdarlığını bildirmişdir.

Sonra nizamişünas alimlər Samir Pişnamazzadənin “Nizami Gəncəvi məqbərəsinin tarixi və taleyi” və “Nizami Gəncəvi yaradıcılığına əxilik ideologiyasının təsiri”, Xəlil Yusiflinin “Nizami Gəncəvi: sələflər və xələflər”, Mübariz Yusifovun “Nizamidə azərbaycançılıq”, Sevda Qurbanəliyevanın “Nizami Gəncəvinin musiqi dünyası” və “Nizami Gəncəvi obrazları miniatürlərdə” mövzularında məruzələri dinlənilmişdir.

Mərasimdə çıxış edən şəhər ziyalıları da görülən işləri yüksək dəyərləndirmiş və bildirmişlər ki, bu günədək qeyd olunan yubileylər sırasında ilk dəfə olaraq Gəncə Şəhər İcra Hakimiyyəti tərəfindən “Xəmsə” külliyyat halında nəşr edilmişdir. Bütün bunlar Nizami yurdu Gəncənin elm və mədəniyyət mərkəzinə çevrilməsi deməkdir.

Sentyabrın 30-da Gəncədə dahi Azərbaycan şairi Nizami Gəncəvinin 870 illik yubileyi müxtəlif tədbirlərlə davam etdiriləcəkdir.

----------
09:22

Milli.Az EL TV-yə istinadən xəbər verir ki, tədbirlərə 150 ölkənin hökumət nümayəndələri, nizamişünaslar və xeyli sayda alimlər qatılıb.

Yubiley tədbirləri ulu öndər Heydər Əliyevin məzarının ziyarəti ilə başlayıb. Ardından tədbir dahi Azərbaycan şairi və mütəfəkkiri Nizami Gəncəvinin məqbərəsi önündə davam edib. Gələn qonaqlar dünyanın 10 dilində salamlanıblar. Çıxış edən natiqlər bildiriblər ki, Azərbaycanın dünyadakı fəxri olan Nizami Gəncəvi milli şair olmaqla bərabər, həm də bəşəri şair kimi bütün dünya xalqları arasında sevilir. Sonra şeyxin məzarı ziyarət olunub, qəbri üstünə gül dəstələri düzülüb.

Qeyd edək ki, tədbirdə Litvanın 6-cı porezidenti Vaira Vike-Freiberga, Qırğızıstanın keçmiş xarici işlər naziri və müvəqqəti hökumətin rəhbəri vəzifəsində çalışan Roza Atunbayeva, Misirin İsgəndəriyyə kitabxanasının direktoru İsmayıl Sergaləddin, həmçinin bir sıra dünya şöhrətli yazarlar da iştirak edirlər. Litvanın 6-cı prezidenti Varia Vike Freiberga bildirib: "Bu tədbirlərdən çox təsirləndim. Azərbaycan xalqı öz mütəfəkkirinə, doğrudan da, böyük qiymət veirir. Həqiqətən də, Nizami Gəncəvi əvəzolunmaz söz xəzinəsi ilə öz adını dünya ədəbiyyatına qızıl hərflərlə yazdırıb".

Dünya şöhrətli alim, Qırğızıstanın xalq şairi Oljas Süleymenov isə 30 il bundan öncəki Gəncə xatirələrindən və dahi söz ustadından danışıb. Qırğızıstanın sabiq xarici işlər naziri vaxtı ilə prezident səlahiyyətlərini icra edən Roza Atunbayeva deyib: "Mən bu gün Nizami Gəncəvi kimi şairin yubileyində iştirak etməkdən olduqca qürur duyuram. Onu deyə
bilərəm ki, bəşəriyyətin böyük dəyər verdiyi Nizami Gəncəvi türk dünyasının fəxridir".

Onu da qeyd edək ki, Azərbaycandan yubileyə qatılanlar sırasında mədəniyyət və turizm naziri Əbülfəz Qarayev və təhsil naziri Misir Mərdanov da var.

Qonaqlar xor kollektivlərinin ifasında şairin sözlərinə bəstələnən əsərləri dinləyiblər. O cümlədən Gəncə Dövlət Dram Teatrının aktyor truppasının iştirakı ilə Nizaminin "Xəmsə"sindən hazırlanan səhnələrə də tamaşa ediblər.