İdxal-ixracda ət və ət məhsulları üstünlük təşkil edir
“Ötən altı ay ərzində Azərbaycan 54,3 ton mal və qoyun bağırsağı, 2 baş iş atı ixrac edib. Bu dövr ərzində ölkəyə 774 ton donuz əti, 1499 ton donuz piyi, 868 ton it-pişik yemi gətirilib”.
Bu barədə məlumat verən Kənd Təsərrüfatı Nazirliyi yanında Dövlət Baytarlıq Nəzarəti Xidmətinin ictimayətlə əlaqələr şöbəsinin rəhbəri Yolçu Xanvəli onu da bildirdi ki, ölkəyə idxal olunan həmin məhsullar Respublika Baytarlıq Laboratoriyasında bakterioloji, kimyəvi-toksikoloji, radioloji müayinələrdən keçirildikdən və qida üçün yararlılığı müəyyən edildikdən sonra istifadəyə verilib.
Xidmət sözçüsünün sözlərinə görə, cari ilin ötən dövründə respublikamıza 175 ton qaramal əti, 1802 ton camış əti, 14,5 ton qoyun əti, 11619 ton quş əti, 2053 ton balıq, 676 ton quş əti sosiskası, 40 ton quş əti kolbasası, 774 ton donuz əti, 1499 ton donuz piyi gətirilib. Ət və ət məhsulları ilə yanaşı, ölkəyə ağartı məhsulları da idxal olunub. Belə ki, altı ay ərzində 5488 ton süd, 5228 ton süd məhsulları, 2807 ton pendir, 918 ton quru süd, 2923 ton qatılaşdırılmış süd, 1813 ton mayonez idxal olunub. Ölkəyə gətirilən ərzaq məhsulları arasında 13589 ton kərə yağı, 16033190 ədəd damazlıq yumurta, 10 ton quru yumurta tozu və zülalı, 2272415 baş bir günlük cücə, 2947 ton xama və yoqurt, 20080 kq təbii bal, 1266 ton balıq konservası, 868 ton it-pişik yemi və s. baytarlıq nəzarətində olan məhsullar da var.
Y. Xanvəli onu da qeyd etdi ki, ölkəmizdən 496220 ədəd iribuynuzlu, 660000 ədəd xırdabuynuzlu heyvan dərisi, həmçinin 37798 kq mal əti konservası, 54,3 ton mal və qoyun bağırsağı, 30 ton yuyulmuş yun, 2 baş iş atı, 302400 ədəd mətbəx yumurtası, 23,3 ton dondurma və s. ixrac edilib.
Hörmətli ziyarətçi, Siz qeydiyyatdan keçməmiş istifadəçi kimi sayta daxil olmusunuz.
Biz Sizə
qeydiyyatdan keçməyi və ya öz adınz ilə sayta daxil olmağı məsləhət görürük.