Azərbaycanda avqust ayında da uzun müddət davam edən isti günlər gözlənilmir. Bunu  Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun baş hidroloqu Asif Verdiyev bildirib. Onun sözlərinə görə, avqustun ayrı-ayrı günlərində qısa müddət davam edən isti havalar olacaq.

A.Verdiyev deyib ki, Azərbaycanda bu ilin iyulunda müşahidə edilən hava şəraiti bu ay üçün xarakterik deyil. Bu il iyulda havanın temperaturu bəzi günlərdə iqlim norması daxilində olsa da, bəzi günlərdə normadan aşağı olub. Baş hidroloqun sözlərinə görə, builki kimi sərin iyul ayları əvvəlki illərdə də müşahidə edilib. Son 100 ildə ən sərin iyul ayı 1918-ci ildə olub. Ondan sonra nisbətən sərin iyul ayları isə 1974, 1985, 1993 və 2004-cü illərdə olub. Bu il iyulda Bakıda gündüz saatlarında ən yüksək temperatur 40 dərəcə olub. İyulda Bakıda belə temperatur 1952, 2010 və 2011-ci illərdə də qeydə alınıb.

Mütəxəssisin sözlərinə görə, son 40 ildə ən isti iyul 2010-cu ildə müşahidə edilib. Həmin il iyulun 11-12-də Bakıda 40-41, Kürdəmir, Zərdab rayonlarında 42-43, Culfada 44 dərəcə isti olub. 2011-ci il iyulun 22-də Bakıda 40, iyulun 30-31-də Zərdabda 44, Culfada 45 dərəcə isti qeydə alınıb.

 Qeyd edək ki, bu il iyunun 29-dan başlayaraq, iyulun 12-dək ölkə ərazisində hava şəraiti qeyri-sabit olub. Qısa sürən isti günlərdən sonra iyulun 14-dən 17-dək ölkədə yenidən sərin hava şəraiti müşahidə ediləcək.