Azərbaycan Silahlı Qüvvələrinin yaranmasının 94-cü ildönümü münasibəti ilə Tovuz rayonunun N saylı hərbi hissəsində tədbir keçirilib.

Tədbirdə əsgər və zabit heyətini bayram münasibəti ilə təbrik etməyə gələn rayon rəhbərliyi ilə yanaşı, millət vəkili Qənirə Paşayeva, Milli Qəhrəman Mübariz İbrahimovun atası Ağakərim İbrahimov və digər qonaqlar toplaşıb.

Natiqlər bu gün münasibəti ilə hərbçiləri təbrik ediblər. Həmçinin ordumuzun yaranma tarixi və onun artan qüdrətindən danışıblar. Daha sonra hərbi orkestrin ifası altında parad keçirilib. N saylı hərbi hissənin şəxsi heyəti Azərbaycanın Dövlət bayrağını meydana gətiriblər.

Tədbirdə Milli Qəhrəman Mübariz İbrahimovun xatirəsini yaşadan iki disk də təqdim olunub. Onlardan biri “Şəhidim” musiqi kompozisiyası, digəri isə “Müqəddəs zirvə” adlı filmin diskləri olub.

 Qeyd edək ki, xidmətdə fərqlənən əsgərlərə hədiyyələr təqdim olunub. Hərbi hissəyə isə Mübariz İbrahimovun heykəli təqdim olunub.