Ötən gün ölkə ərazisində müşahidə edilən anomal istilər nəticəsində Bakıda 3 nəfəri gün vurub. Gün vurmadan zərər çəkənlər 25, 11, 30 yaşlı kişilərdir. 

Günəş vurması isti hava şəraitində gün altında çox qalanlarda müşahisə edilən yay xəstəliyidir. Gün vurmanın əlamətləri şiddətli baş ağrısı, ürək bulantısı, qusma və yüksək temperaturda özünü göstərir.

Günəş vurması çox təhlükəli haldır. Əgər vaxtında müdaxilə edilməsə ölümlə belə nəticələnə bilər. Bəzi hallarda isə sinir sistemində qalıcı fəsadlara səbəb ola bilər.

Belə halla qarşılaşanda dar geyimləri çıxarmaq, başa soyuq kompress və buz torbası qoyulmalıdır. Hərarət çox yüksələrsə bədəni nəm dəsmalla sarımaq, xəstəni kölgə, sərin yerdə saxlamaq lazımdır. Xəstəni sərinlətməyin ən yaxşı yolu soyuq su vannasıdır.

İlk yardım

Zərərçəkəni kölgəyə aparmaq və başa soyuq kompres etmək lazımdır. Ağır formalarda süni nəfəsvermə də yerinə düşər.

Təcili görüləcək işlər:

zərərçəkəni həmin sahədən uzaqlaşdırmalı
naşatır spirtini tənzifə vuraraq iynətməli
üst geyimini soyundurmalı
üzünə soyuq su çiləməli, döşünə yaş dəsmal qoymalı
başına soyuq su kompresi qoymalı
yelləməli
təcili yardım çağırmalı

Uşaqlar üçün tədbirlər

Günəş şüalarının qüvvətli olduğu saatlarda - səhər 10:00 ilə günortadan sonra 15:00 arasında uşaqları açıq havada saxlamayın. Uşaqlara kölgə anlayışını öyrədin. Əgər gölgəniz özünüzdən kiçikdirsə çölə çıxmayın. Papaq, uzun qollu köynəklə günəşdən qoruyun. 6 aydan kişik uşaqlarda günəşdən qoruyucu kremlərdən istifadə etməyin. Böyük uşaqları günəşə çıxarmadan azı yarım saat əvvəl kremləyin. Kənarı qapalı eynək taxın. Ağ qum və su günəş şüalarının əks edilməsini artırır. Bu kimi yerlərdə xüsusuilə diqqətli olun.

Tərlə birlikdə bədənin su və duz itirməsi "isti yorğunluğu" adlanan halsızlıqla müşahidə edilən sindroma səbəb ola bilər. Əgər bu vəziyyət nəzarətdə saxlanmasa bədənin temperatur tənzimləmə sistemi pozulur.

Gün vurmadan qorunmaq üçün günəşli havada baş örtüyü olmadan gəzmək məsləhət görülmür. Baş örtüyü də açıq rəngli materialdan olmalıdır ki, günəş şüasını az qəbul etsin. İsti havada geyim də enli, açıq rəngli, yungül, pambıq və ya kətan parçadan olmalıdır.