Abşeron rayon Polis İdarəsinin əməkdaşları bu gün gecə Saray qəsəbəsində törədilmiş ikiqat cinayətdə şübhəli bilinən şəxsi saxlayıblar. İkiqat qətlin qurbanları Qəsəbə Bələdiyyəsinin sədri 1976-cı il təvəllüdlü Vəsilə Əbdülhəsənova və onun həyat yoldaşı Vəfadar Əbdülhəsənov olub.

Azad.Az xəbər verir ki, bu barədə Vesti.Az-a Abşeron rayon Polis İdarəsindən bildiriblər.

Saxlanılan şəxs Saray qəsəbəsinin sakini 1980-ci il təvəllüdlü Fədail Hüseynov olub

Hal-hazırda istintaq-əməliyyat qrupu saxlanılan şəxsi dindirir. Hələlik isə cinayətin gecə saat birdə törədildiyi məlumdur. Qatil Əbdülhəsənovların evinə daxil olarkən evdə cütlükdən başqa həm də Vəfadarın valideynləri və onların iki uşağı olub.

Bundan başqa, qətlin uşaqların gözü önündə baş verdiyi qeyd edilib. Qatil öncə Vəfadara çoxsaylı bıçaq zərbələri vurub, sonra isə onun arvadının boğazını kəsib.

F.Hüseynovun dəllal işlədiyi məlumdur. Mümkün versiyaya görə, qətl intiqam məqsədi ilə törədilib, belə ki, qatil evdən heç nə götürməyib.

Qeyd edək ki, Fədail Hüseynov Sumqayıtda saxlanılıb. Cinayətin motivi olaraq Əbdülhəsənovların dəllala borclu olduğu pulların səbəb olması ehtimal edilir. Həmçinin dünən Vəsilə Abdullayevanın ad günü olduğu qeyd edilir.