Ukraynada müdafiə naziri vəzifəsini icra edən Mixail Koval bəyan edib ki, Ukrayna hərbçiləri Krımdan Ukraynanın materik hissəsinə silahla və bayraqlarını uca tutaraq qayıdacaqlar.

Koval bu barədə Nazirlər Kabinetinin iclasından öncə jurnalistlərə şərh verərkən bildirib. “Onlar qürurla bayraqlarını qaldıraraq, silahları ilə bizə qayıdacaqlar”,- deyə Koval Rusiya prezidentinin mətbuat katibi Dmitri Peskovun bu barədə dediklərini şərh edərkən bildirib. Peskov bildirmişdi ki, Ukrayna hərbçilərinin Krımı silahla və ya silahsız tərk etməsi məsələsini Rusiya həll edəcək.

Kovalın sözlərinə görə, “kompleks tədbirlər gerçəkləşdirilir və hər şey yaxşı olacaq”. Həmçinin Koval əmin edib ki, hərbçilərin və bütün Ukrayna xalqının ümidlərini doğrultmaq üçün əlindən gələn hər şeyi edəcək.