Krımda referendum martın 16-da keçiriləcək. Müvafiq qərarı muxtar respublikasının Ali Şurası qəbul edib. Krım baş nazirinin müavini Rüstəm Dəmirqəliyev bildirib ki, referenduma iki məsələ çıxarılacaq.

Belə ki, yerli sakinlər Krımın Rusiya Federasiyasına daxil olması təklifinə və 1992-ci il konstitusiyasının bərpasına münasibət bildirəcək.

1992-ci ildə qəbul olunmuş konstitusiyaya əsasən, muxtar respublika Ukrayna tərkibinə daxil olur və onunla münasibətlərini müqavilə və sazişlər əsasında tənzimləyir.

Ukraynanın Krım Muxtar Respublikasının Ali Soveti Rusiya rəhbərliyinə müraciət edərək Rusiya Federasiyasının subyekti qismində tanınması və Rusiya Federasiyasının tərkibinə daxil edilməsi ilə bağlı prosedurlara başlanılmasını xahiş edib. Bu barədə Krım Ali Sovetinin bu gün qəbul etdiyi qətnamədə bildirilir. Krım Ali Sovetinin deputatları Rusiya prezidenti Vladimir Putin və Rusiya parlamentinə müraciət edirlər.