Son bir həftədə ermənilər cəbhə xəttində yenidən fəallaşıblar. Xüsusilə gecə saatlarında Milli Ordumuzun mövqeləri ilə yanaşı təmas xəttində yerləşən yaşayış məntəqələri atəşə məruz qalır. ANS PRESS-in bölgə müxbiri cəbhə xəttində baş verənləri lentə almaq məqsədiylə qaranlıq düşəndən sonra Ağdamın Orta Qərvənd kəndinə gedib. Hava qaralan kimi bu kənddə hamı evlərinə çəkilir.
İşğal altındakı Şıxlar kəndindən Orta Qərvənd ara-sıra atəşə tutulur. Qarşı tərəf hədəfi aydın müşahidə etmək üçün uzun məsafəni işıqlandıran xüsusi qurğulardan istifadə edir. Ağdamın güllə mənzilində yerləşən yaşayış məntəqələrindən biri də Çıraqlı kəndidir. Küçələrdə tək-tək insan gözə dəyir. Sakinlərin sözlərinə görə, son bir həftədə kənd müxtəlif saatlarda atəşə məruz qalır.
Kənd bələdiyyəsinin sədri Habil Abbasovun sözlərinə görə, son 1 həftədə sakinlər əkin sahələrinə belə çıxa bilmirlər. "Əsasən axşamlar iriçaplı silahlardan atırlar. Hətta təhlükəli vəziyyət o dərəcəyə çatıb ki, kəndə gələndə maşınların işığını söndürmək məcburiyyətində qalırıq”.
Son bir həftə ərzində Ermənistan ordusu cəbhənin Qarabağ istiqamətində dəfələrlə hücum əməliyyatları keçirib və hər dəfə layiqli cavabını alaraq geri çəkilmək məcburiyyətində qalıb. Əldə etdiyimiz məlumata görə, hətta Xocavənd və Füzuli istiqamətlərində qarşı tərəfin 10-a qədər hərbi qulluqçusu da məhv edilib. Hərbi əməliyyatlar zamanı Azərbaycan Ordusu isə 1 itki verib. Tərtər rayonu istiqamətində Ermənistan silahlı qüvvələrinin hücumunun qarşısını alan zaman ordumuzun zabiti, kapitan Elnur Cəfərov qəhrəmanlıqla şəhid olub. Hazırda isə cəbhədə gərginlik davam edir.
Hörmətli ziyarətçi, Siz qeydiyyatdan keçməmiş istifadəçi kimi sayta daxil olmusunuz.
Biz Sizə qeydiyyatdan keçməyi və ya öz adınz ilə sayta daxil olmağı məsləhət görürük.