Gürcüstanın “Multi-Pulti dünyası” teatrı “Maşa və Ayı” tamaşasının “Maşa və Ayının Şərqdə yeni il sərgüzəştləri” adlı yeni seriyası ilə Azərbaycan tamaşaçılarının görüşünə gələcək. ANS PRESS-in məlumatına görə, yeni il bayramı ərəfəsində baş tutacaq səfər zamanı balacalar sevimli qəhrəmanlarını canlı izləmək imkanına sahib olacaq.

Həmçinin digər sevimli nağıl qəhrəmanlarını 27, 28, 29, 30 dekabr, 2, 3, 4 yanvar tarixlərində Azərbaycan Dövlət Akademik Opera və Balet Teatrının səhnəsində görə biləcəklər.

Tamaşadakı hadisələr Yeni il ərəfəsində cərəyan edir. Tamaşa iki variantda - Azərbaycan və rus dillərində hazırlanacaq. Məşhur cizgi filminin motivləri əsasında, gürcü rejisoru Qoça Kviçianın quruluşunda hazırlanan tamaşada gürcü və azərbaycanlı aktyorlar çıxış edəcək.

Qeyd edək ki, tamaşa məxsusi olaraq, Azərbaycan tamaşaçıları üçün “Maşa və Ayı” cizgi filmi və Şərq nağıllarının motivləri əsasında hazırlanıb.