24 yaşlı amerikalı mühəndis Pol Sammut dünyanın ən zəhlətökən saatını yaradıb. “Ramos” adı verilmiş saatın prototipi artıq Nyu Yorkda hazır vəziyyətə gətirilib. “Ramos”un digər zəngli saatlardan əsas üstünlüyü ondadır ki, saatın zəngi işə düşdükdə, onu barmaqla və ya ən pis halda şillə-qapazla dayandırmaq olmur. Saat faktiki olaraq adamı yatmağa qoymur. Wi-Fi sistemi ilə təchiz olunmuş saatın sinirləri yerindən qoparan səsini kəsmək üçün istifadəçi istər-istəməz yerindən duraraq, digər otaqda yerləşən düyməni basmalı olacaq.

Pol bu saatın ixtirasında uşaqlıq illərindən ilhamlandığını bildirib. “Məktəbə getdiyim illərdə, əla zəngli saatım var idi – bu mənim anam idi. Yerimdən tamam durmayınca, məndən əl çəkməzdi” deyən Pol uşaqlıq xatirələrini bölüşüb.

İnadkar zəngli saat ideyası internetdə böyük marağa səbəb olub. Artıq saatın istehsalı üçün 75 min dollarlıq fond yaradılıb. Sammut ilk müştərilərin artıq sentyabr ayında yeni saatı əldə edə biləcəyini bildirib.