Müsəlmanların ən müqəddəs kitabı olan Quranda belə bir ayə var: “Allah -Təala bu dünyada insan övladına onun üçün dəyərli olan iki nemət verib. Biri övlad, digəri isə mal-dövlət. İnsan bunlardan hansına daha çox meyl edib bağlanarsa, Allah onu əlindən alar”.

Aprelin 19-da balaca Sunayın başına gələn dəhşətli faciə məni bu yazını yazmağa vadar etdi. Əvvəldə müqəddəs kitabımız Qurandan sitat gətirməyim əbəs deyil. Bəlkə də, Sunayın valideynləri onu həddindən artıq sevdikləri üçün, onun üstündə çox-çox titrədikləri üçün… Davamını gətirməyə dilim gəlmir. Bəlkə də bu sözlərimdən ötrü bəziləri məni qınayacaq, mənimlə razılaşmayacaq. Və düşünəcəklər ki, hər ana öz övladını çox istəyir. Nə bilim, bəlkə də onun anasını bu sözlərimlə təsəlli edə biləcəyimi fikirləşdiyim üçün belə yazıram.

Sunayın ailəsi ilə çox yaxın əlaqələrimiz olduğundan, onu çox yaxından tanıdığımdan onun yoxluğunu qəbul etmək mənə heç də asan deyil. Onunla ilk dəfə danışanda yaşda məndən dəfələrcə balaca olmasına baxmayaraq, bunu mənə hiss etdirmədi. Sunay çoxlarında olmayan istedada, dünyagörüşə, qabiliyyətə malik bir qız idi. Həyata fərqli baxışı, sakit təbiətli olması, insanlara münasibəti də fərqli idi Sunayın… Gələcəkdə mügənni olmaq istəyən bu balaca qızcığaz hardan bileydi ki, onun ifa etdiyi mahnıları dinləyiciləri elə onun öz yas mərasimində eşidəcək?...

İnanın ki, fikirlərimi ifadə etməkdə çox çətinlik çəkirəm. Bəlkə 1 ay bundan əvvəl kimsə mənə Sunay haqqında yazacağımı desə, inanmazdım. Amma yox, yazardım. Onun ifa etdiyi mahnılardan, onun 13 yaşında 5 dil bilməsindən, ona verilən Allah vergisindən yazardım. Hardan bilərdim ki, indi əllərim əsə-əsə, üreyim titrəyə-titrəyə Sunayın ölümü haqqında yazacağımı???

Sunay bu həyatdan gedərkən xoşbəxt idi. Çünki, yuxarıda da qeyd etdiyim kimi, onunla nəfəs alan anası vardı. Amma bu gün övladını itirən ananı sakitləşdirmək heç də asan deyil…

Allahdan Yasəmən xanıma, Rasim bəyə, Sunayın doğmalarına, dostlarına səbir diləyirəm. Və demək istəyirəm ki, SUNAY bəmbəyaz bir mələk idi ki, bu yaşında bu çirkli dünyadan uçub getdi. Allah ona bu dünyada görmədiklərini o biri dünyada yaşadar, İNSALLAH.

Allah sənə rəhmət eləsin! Yerin behiştlik olsun, SUNAYIM!

Ayşə İsazadə