Respublika Seysmoloji xidmət mərkəzinin Seysmoloji şöbəsinin müdiri Tahir Məmmədli deyibki: "Son günlər Şəki və Qubada baş verən zəlzələlər Zaqataladakı zəlzələnin davamıdır. Zaqatalada zəlzələ baş verərkən belə davamlı zəlzələlərin olacağını əvvəldən məlumat vermişdik. Bu tip zəlzələ seriyaları hələ 2-3 ay davam edəcək”.  

Seysmoloq bu tip zəlzələlərin ölkə ərazisində tez-tez müşahidə edildiyini bildirdi. “Seysmoloji xidmət mərkəzinin stansiyaları gün ərzində onlarla belə zəlzələ qeyd edir. Sadəcə, Beynəlxalq seysmoloji mərkəzlərin qərarlarına görə, maqnitudu 3 bal olan zəlzələ barədə ictimaiyyətə məlumat verməliyik. Belə zəlzələləri anomal hadisə kimi qiymətləndirmirik”.

T.Məmmədli hələ ki, zəlzələ barədə əvvəlcədən proqnoz vermək mümkün olmadığına görə, belə təkanların güclü bir zəlzələ ilə nəticələnəcəyini proqnozlaşdıra bilmədiklərini dedi.

“Azərbaycan ərazisində çoxlu aktiv zonalar var. Həmin ərazilərdə deformasiya prosesləri gedir və bunlar uzun illərdir davam edir. Bu tip deformasiyalar nəticəsində yaranan gərginlik zəlzələlər formasında büruzə verir. Bu zaman həm güclü, həm də zəif zəlzələlər ola bilər. Bu tip qırılma zonaları olan bölgələrdə Şamaxı-İsmayıllı, Zaqatala-Balakən, Şəki, Lənkəran, Quba, Xəzər dənizi və "Azəri-Çıraq" yataqları olan ərazilərdə mütəmadi olaraq zəif təkanlar baş verir”.

Seysmoloq bu sahədə araşdırmalar aparıldığını və xidmətin daha da inkişaf etdirilməsi üçün müxtəlif xarici ölkələrlə birgə müzakirələrin aparıldığını bildirdi.

“Seysmik stansiyalarımız Amerika istehsalı olan çoxlu sayda müasir cihazlarla təmin olunub. Həmin cihazlar rəqəmsaldır, peyk rabitəsi vasitəsilə məlumatları seysmik stansiyanın qəbulu və emalı müəssisəsinə ötürür. Bir neçə gün əvvəl Amerikanın “Kinemetriks” şirkətinin nümayəndələri ölkəmizdə oldular. Dünyanın çox nadir ölkələrində olan dənizdibi stansiyalarının Azərbaycanda qurulması üzrə texniki məsələlər müzakirə olundu. Yaxın zamanda Xəzər dənizində 3 yerdə dib seysmik stansiyaları quraşdırılacaq”