Kainatda var olan hər şey Allahın sonsuz gücünü və sonsuz ağlını əks etdirir. Allah dünyada imtahanın tələbi olaraq baş verənləri insan ağlının qavraya biləcəyi məqbul səbəb-nəticə əlaqələri daxilində göstərir. Buna görə də insanlar bir meyvə gördüklərində, bunun toxumdan inkişaf edən ağacın zaman keçdikcə verdiyi meyvə olduğundan şübhələnmirlər. Əlbəttə ki, Allahın qanununa görə dünyada meyvənin yaranma səbəbi budur, lakin unutmamaq lazımdır ki, Allah dilədiyi təqdirdə bütün kainatı səbəbsiz yarada bilər. Allah dilədiyini dilədiyi şəkildə və zamanda, nümunəsiz olaraq yaradan, heç bir şeyə ehtiyacı olmayandır. Bu səbəbdən Allahın yaratması üçün heç bir səbəbə, vasitəyə, mərhələyə ehtiyacı yoxdur. Dünyada hər şeyin müəyyən səbəblərə, təbiət qanunlarına bağlı olması insanları yanıltmamalıdır. Allah bütün bu səbəblərin Yaradıcısı olaraq bunlardan tamamilə uzaqdır. Belə ki, cənnətdə səbəblərə bağlı yaradılış aradan qalxacağı üçün ağacdan qopan meyvənin yerinə dərhal yenisi geri gələcək, heç bir azalma olmayacaq. Səbəbləri də, nəticələri də yaradan Allahdır. Məsələn, ağacın kölgəsinə baxdığımızda bu kölgənin səbəbinin Günəş şüalarının əks olunma bucağı olduğunu bilirik. Kölgə Günəşin nəticəsidir, lakin Günəşi kölgəyə səbəb edən Allahdır. Bu vəziyyət ayədə belə bildirilib:
“Məgər Rəbbinin kölgəni necə uzatdığını görmürsənmi? Əgər O istəsəydi, onu hərəkətsiz halda saxlayardı. Sonra Biz günəşi onun bələdçisi etdik. Sonra o kölgəni yavaş-yavaş Özümüzə tərəf çəkdik”. (Furqan surəsi, 45-46)
"... Allah onlardan razıdır, onlar da Ondan razıdırlar. Bu, böyük uğurdur." (Maidə surəsi, 119)
Dünyada bu şəkildə hər bir şeyin səbəb nəticə əlaqəsi daxilində yaradılması Allahın sənətidir və Rəbbimizin bu təcəlliləri sonsuzdur. Allah hər şeyi istədiyi anda, istədiyi şəkildə yarada bilər və ya dilədiyi hər hansı bir formaya çevirə bilər. Kainatı yoxdan var edən Allah, dilədiyi zaman dünyada qavramağa çalışdığımız qanun və səbəbləri aradan qaldıracaq. Saleh müsəlmanlar cənnətdə ağıllarına gələn, xoşladıqları hər bir şeyi istəyə biləcək, istədikləri anda Allahın izni ilə bütün bunlara sahib olacaqlar. İstər özləri, istərsə də ətrafdakı hər bir şey istədikləri şəkil və surətdə olacaq, hər istədiklərini edib, zövq alacaqları nemətlər içində yaşayacaqlar. Üstəlik bunların heç biri hər hansı bir ehtiyacı ödəmək, bir əskikliyi aradan qaldırmaq, bir qüsuru örtmək məqsədi ilə edilməyəcək, yalnız Allahdan bir nemət və gözəllik olaraq cənnət əhlinin zövq almaları üçün olacaq.