"DÇ-2014"ün seçmə mərhələsi çərçivəsində ötən gün evdə Şimali İrlandiyanı 2:0 hesabı ilə məğlub edən Azərbaycan millisi tarixi rekorda imza atıb.

Qol.Az-ın məlumatına görə, yubliey - 200-cü matçına çıxan yığmamız qələbə qazanmaqla tarixində ilk dəfə seçmə mərhələdə 8 xal toplamağı bacarıb.

Üstəlik bu qələbə sayəsində yığmamız turnir cədvəlinin 4-cü pilləsinə yüksəlib. Berti Foqtsun komandasının seçmə mərhələni hansı pillədə başa vuracağı hələlik sual altındadır. Belə ki, oktyabrın 15-də doğma meydanda Rusiya millisi ilə qarşılaşacaq Berti Foqtsun komandası rəqibinə uduzacağı təqdirdə 4-cü pilləni əldən verə bilər. Lakin bir şərtlə ki, millimizin ən yaxın izləyiciləri Şimali İrlandiya və Lüksemburq yığmaları son turda qələbə qazansınlar.

"AÇ-2012"nin seçmə mərhələsində tarixində ilk dəfə 7 xal toplayan millimiz bu dəfə nəticəsini bir qədər də yaxşılaşdırıb. Azərbaycan millisinin seçmə mərhələlərdə öncəki çıxışlarına nəzər salsaq, bu dəfəki nəticənin daha yaxşı olduğunu görərik. Lakin yığmamız Rusiya ilə oyunda ən azı bir xal qazanmaqla nəticəsini daha da yaxşılaşdıra bilər. Üstəlik bu da turnir cədvəlində 4-cü pillədəki mövqeyimizi qorumağa şərait yaradacaq.

Millimizin seçmə mərhələlərdəki sitatiskası 

"AÇ-1996"

Azərbaycan - 1 xal (6 komanda arasında 6-cı)

"AÇ-2000"

Azərbaycan - 4 xal (6 komanda arasında 5-ci)

"AÇ-2004"

Azərbaycan - 4 (5 komanda arasında 5-ci)

"AÇ-2008"

Azərbaycan - 5 (8 komanda arasında 8-ci)

"AÇ-2012"

Azərbaycan - 7 xal (6 komanda arasında 5-ci)

"DÇ-2002"

Azərbaycan - 5 xal (6 komanda arasında 6-cı)

"DÇ-2006"

Azərbaycan - 3 xal (6 komanda arasında 6-cı)

"DÇ-2010"

Azərbaycan - 5 xal (6 komanda arasında - 5-ci)

"DÇ-2014"

Azərbaycan - 8 xal (6 komanda arasında 4-cü)

Rusiya ilə oyun qalır