Bakı-2015 birinci Avropa Oyunlarında Azərbaycana 15-ci qızıl medal qazandıran boksçumuz Teymur Məmmədov qələbəsindən danışıb.

Azad.Az anspress-ə istinadən xəbər verir ki, Teymur Məmmədov ona dəstək olan hər kəsə təşəkkür edib:

"Çox böyük sevinc hissi keçirirəm. Çox xöşbəxtəm ki, bir tərəfdən qızıl medal qazanmışam, digər tərəfdən də mükafatı mənə prezidentimiz təqdim etdi".

O, final döyüşünün o qədər də ağır olmadığını deyib: "Döyüşdən döyüşə formaya düşürdüm. Ona görə də final döyüşündə formada idim və fərqi yox idi, bu rəqib yox, başqa rəqib də olsaydı, mən hamıdan güclü idim".

Gələcək planları haqqında danışan Teymur bildirib ki, məşqləri davam etdirəcək: "Dayanmayacağam, bundan sonra məşqləri davam etdirəcəyəm. Olimpiadaya düşməyi qarşıma məqsəd qoymuşam. Dünya çempionatı olaraq, orada Rio-de-Janeyroya lisenziya qazanmalıyam. Məqsədim budur".

Teymur Məmmədov bu qələbəsini dünyaya gələcək oğluna həsr etdiyini bildirib.