İspaniyanın "Atletiko" (Madrid) klubu növbəti transfer hədəfini açıqlayıb.

İspaniya mətbuatının  verdiyi məlumata görə, Madrid təmsilçisi "Sevilya"nın futbolçusu İvan Rakitiçə "elçi" düşüb.

"Atletiko"nun baş məşqçisi Dieqo Simeone xorvatiyalı futbolçunu komandasında görmək istədiyini açıqlayıb. Mövsümün sonunda komandası ilə müqaviləsi başa çatacaq 25 yaşlı futbolçu ilə "Çelsi" və "Mançester Yunayted" klubları da yaxından maraqlanır. Lakin "Sevilya" rəhbərliyi də Rakitiçi komandada saxlamaq niyyətindədir.

Qeyd edək ki, Rakitiç 2011-ci ildə "Şalke"dən "Sevilya"ya transfer olunub.

"Mançester Siti" klubunun fubolçusu Samir Nəsri maraqlı açıqlamaları ilə diqqət çəkib

"ESPN"ə danışan fransız futbolçu Çempionlar Liqasının 1/8 finalda "Real" və "Barselona" ilə qarşılaşmaq istəmədiklərini bildirib:

"Bütün Avropa bizim "Arsenal" (6:3) oyunumuzu gördü. Daha öncə ÇL-də "Bavariya"ya 3:2 hesabı ilə qalib gəlmişdik. Artıq Avropada bizdən çəkinirlər. Düşünmürəm ki, hətta "Real" və "Barselona" da Çempionlar Liqasının 1/8 finalında bizimlə qarşılaşmaq istəsin. Mən bu mərhələdə PSJ, "Atletiko" və ya "Borussiya" ilə qarşılaşmağı arzu edirəm. Ancaq "Real" və ya "Barselona" ilə düşsək, bu barədə daha çox onlar düşünməli olacaqlar".

Qeyd edək ki, Çempionlar Liqasında 1/8 final mərhələsinin püşkü bu gün, Bakı vaxtı ilə saat 15:00-da atılacaq.

"Tottenhem" baş məşqçisi Andre Villaş-Boaşı istefaya göndərib.

 Bu barədə klubu rəsmi saytı məlumat yayıb. Portuqaliyalı çalışdırıcı ilə qarşılıqlı razılaşma ilə müqavilənin ləğv olunduğu bildirilib.

Komandanın son oyunlarda böyükhesabla məğlub olması A.Villaş - Boaşla yolların ayrılmasına səbəb olub.

Qeyd edək ki, gənc mütəxəssis son açıqlamasında "Tottenhem"dən getməyəcəyini bildirmişdi.

Bu gün Çempionlar Liqasında 1/8 final mərhələsinin püşkü atılıb.

İsveçrənin Nyon şəhərində keçiriləcək tədbir Bakı vaxtı ilə saat 15:00-da başlayıb.

Bu mərhələdə oynamaq hüququ qazanan bütün komandaların rəqibləri müəyyənləşib. 1/8 final iştirakçıları arasında ən çox İngiltərə və Almaniya təmsilçiləri var. Belə ki, hər iki ölkənin 4 klubu mübarizəni davam etdirir. İtaliya, Fransa, Rusiya, Türkiyə və Yunanıstan isə hərəyə bir klubla təmsil olunur.

Reqlamentə əsasən qrup mərhələsinin qalibləri ikinci pillənin sahibləri ilə qarşılaşıb. Bu mərhələdə eyni ölkə təmsilçiləri və eyni qrupda çıxış edən komandalar bir-biri ilə görüşməyib.

Qeyd edək ki, 1/8 finalın ilk oyunları 18-19 və 25-26 fevralda keçiriləcək. Cavab görüşləri isə 11-12 və 18-19 mart tarixlərində baş tutacaq.

"Mançester Siti" (İngiltərə) - "Barselona" (İspaniya)

"Olimpiakos" (Yunanıstan) - "Mançester Yunayted" (İngiltərə)

"Milan" (İtaliya) - "Atletiko" (Madrid, İspaniya)

"Bayer" (Leverkuzen, Almaniya) - PSJ (Fransa)

"Qalatasaray" (Türkiyə) - "Çelsi" (İngiltərə)

"Şalke" (Almaniya) - "Real" (Madrid, İspaniya)

"Zenit" (Rusiya) - "Borussiya" (Dortmund, Almaniya)

"Arsenal" (İngiltərə) - "Bavariya" (Almaniya)